Lëvizja Vetëvendosje festoi në orët e para të mëngjesit në Prishtinë, së bashku me mbështetësit e saj, që ishin të shumtë në numër dhe mbushën sheshin “Skënderbeu”.
Kreu i VV, Albin Kurti së bashku me partnerët e koalicionit dhe kandidatët për deputet iu bashkuan simpatizantëve në një skenë të improvizuar, nga ku mbajtën edhe fjalime të shkurtra.
Pasi vlerësoi procesin zgjedhor si demokratik dhe të qetë duke falënderuar autoritetet për organizimin, Kurti me të njëjtën gjuhë si në fushatë, iu drejtua ashpër kundërshtarëve të tij politikë, PDK dhe LDK.
“Çfarë dihet nga rezultatet preliminare është se edhe me i bo bashkë LDK-yhin dhe PDK-yhin nuk bëjnë sa Vetëvendosja jonë. Ajo gjëja tjetër që dihet nga rezultatet preliminare është se populli i Kosovës më datë 9 shkurt 2025 e ka mujt edhe Serbinë”, u shpreh ai.
Sipas tij opozita ka bashkëpunuar me oligarkët në përpjekje për të penguar qeverinë, por ka dështuar të fitojë besimin e qytetarëve.
“Procesi zgjedhor ka qenë demokratik, pa incidente. E falënderoj policinë dhe institucionet përgjegjëse për angazhimin e tyre. Kështu ndodh kur qeveria jemi ne, zgjedhjet zhvillohen lirshëm dhe në mënyrë të ndershme. Kurrë nuk është bërë më tepër luftë ndaj një qeverie sesa ndaj kësaj tonës. Me oligarkë që japin para pa hesap dhe me opozitë që bën marrëveshje edhe me dreqin kundër nesh. Por sërish kanë humbur dhe do të mbeten opozitë, sepse nuk ia duan të mirën as shtetit dhe as popullit”, deklaroi Kurti.
Kurti nuk kurseu as fyerjet ndaj forcave politike rivale, duke i cilësuar si “hajvana”.
“E keni parë çfarë rrenash prej premtimeve kanë dhënë. Thonin buxheti i shtetit do të bëhet më i madh se bruto produkti vendor. Çfarë hajvanash! Ose jepnin premtime për koeficient më shumë se programi i tyre. Çfarë hajvanash! Por, ka kalu koha e hajvanatit. E kanë marrë vesh sonte të gjithë ata. Ata e kanë mashtru vetëm veten e tyre”, tha Kurti.
