Inspektorati Kombëtar për Mbrojtjen e Territorit vijon shembjen e objekteve që preken nga ndërtimi i Unazës së Madhe.
Mësohet se aksioni do të vijojë edhe në ditët në vijim të muajit gusht. Prej më shumë se tri javësh, fadromat e IKMT-së kanë shembur mbi 50 objekte, për t’i hapur rrugë ndërtimit të Unazës së Madhe.
Aksioni është përqendruar në të dy krahët e rrugës pranë Shkollës Teknologjike. Janë mbi 100 objekte, një, dy dhe trekatëshe, që do të shemben për ndërtimin e këtij projekti. Pjesë e shembjeve janë dhe disa karburante që janë ndërtuar në gjurmët ku do të kalojë Unaza e Madhe.
Brenda 15 gushtit, pritet të përfundojë shembja e të gjitha objekteve që preken nga ky ndërtim. Ndërsa pastrimi i inerteve do të kryhet po nga ky inspektorat.
