Pavarësisht lajmeve që kanë qarkulluar për një largim të mundshëm të Igli Tares nga skuadra e Milanit, në orët e fundit situata në kampin kuqezi ka ndryshuar.
Ish-sulmuesi i Kombëtares mund të ruajë pozitat e tij në klub si drejtor sportiv dhe faktor kycc për këtë është trajneri Masimiliano Alegri, lajm që raportohet nga e përditshmja italiane Gazzetta Dello Sport.
Ky i fundit ka besimin e plotë të pronarit të klubit Xherri Kardinale dhe në rast se do të sigurojë kualifikimin për në Champions atëherë do të ketë një rinovim automatik të kontratës deri në vitin 2028.
Por trajneri i kuqezinjve vlerëson maksimalisht punën e Tares në skuadër, pavarësisht vështirësive që kanë pasur të gjithë këtë sezon.
Këtë e konfirmoi në konferencën e fundit për shtyp.
“Tare është drejtori sportiv i Milanit dhe këtë vit ka bërë një punë të shkëlqyer. Me të kam një raport pozitiv. Është një person serioz dhe profesionalisht shumë i zoti. Kohët e fundit është sulmuar, por bilancet bëhen në fund të sezonit”, tha Allegri.
Kuqezinjtë do të luajnë ditën e diel ndeshjen e fundit të sezonit kundër Kaljarit dhe në rast të një fitoreje do të siguronin kualifikimin në Champions League.
Të hënën pritet një takim në klub për të projektuar të ardhmen.
