Kryetari i PDIU, Shpetim Idrizi propozon Pakt Kombëtar si të vetmen rrugë për të dalë nga kriza politike ku është futur vendi. Sipas tij, kjo krizë politikë riciklohet cdo katër vjet, ndaj kjo duhet të marrë fund.
“Kjo është arsyeja që PDIU ka propozuar një Pakt Kombëtar. Nuk e kemi bërë këtë për të qenë në qendër të vëmendjes politike dhe mediatike, por sepse dëshirojmë që të ndalojmë një herë e mirë përsëritjen ciklike të krizave, sepse kemi bindjen e patundur që stabiliteti politik dhe ekonomik do të sjellë shumë më shpejt dhe shumë më cilësisht zgjidhjen e Çështjes Kombëtare.Pakti Kombëtar që ne propozojmë përban vetëm dy pika: Bashkohemi për Reformën në Drejtësi. Bashkohemi për Integrimin Europian të Shqipërisë. Vetëm duke arritur një Pakt Kombëtar të kësaj natyre i pritet udha mosmarrëveshjeve të mëdha dhe krizave që përjetojmë në mënyrë ciklike. Nëse e arrijmë një gjë të tillë nuk do të kemi asnjëherë nevojë për ndërmjetës, as për diplomatë që trokasin në dyert tona për të zgjidhur hallet tona”.
Deklaratat e kreut të PDIU bënë në një aktivitet përkujtimor për masakrën e Selanit. Masakra e Selanit ka ndodhur në mars të vitit 1913, kur pabesisht autoritetet greke mblodhën në Paramithi 72 krerë të parisë së Çamërisë dhe i vranë në grykën e përroit të Selanit.
“Kjo është fillesa e genocidit grek për të shkulur shqiptarët e lashtë nga trojet e tyre”, deklaroi Idrizi.
Idrizi është ndalur në nevojën jetike për të mos harruar. Ai nuk ka kursyer puthadorët e Athinës dhe Beogradit, të cilët i vlerëson si idiotë të dobishëm.
a.ç
