Çështja çame është shumë pranë zgjidhjes sipas kryetarit të PDIU SHpëtim Idrizi, falë kontributit të kësaj partie. Këtë deklaratë ai e dha gjatë një takimi me mbështetësit e kësaj ofrce në kuadër të zgjedhjeve brenda partisë.
Duke u ndalur tek zgjerimi i PDIU, Idrizi tha se më 21 maj do të zhvillohen zgjedhjet brenda partisë për të gjitha strukturat e saj. Ai tha se do të ketë riorganizim të partisë, duke shtuar se do forcohet roli i gruas dhe të rinjve në parti.
“Kemi ndryshuar komunitetin e Çamërisë. Kemi dhënë kreativitet dhe energji. Ne besojmë tek demokracia europiane. Zgjidhja e çështjes çame është shumë afër. Është një çështje që nuk ka kthim pas. Ne kemi fuqizuar zëri e diasporës sonë. Kemi lancuar në tregun politik platforma dhe ide. Jemi partia që ka dhënë kontribut të jashtëzakonshëm në jetën administrative të vendit. Dhamë një dorë për të goditur kënetën që ekzistonte me ndarjen e vjetër. Dekriminalizimi i politikës dhe administratës duhet filluar nga drejtësia. Ne jemi partia ky hyjnë eksponentë të spikatur të partive të mëdha. Ne kemi arritur të shndërrohemi në një nga forcat me të ardhme politike duke rritur elektoratin tonë. Jemi konfirmuar si parti ekzistente e madhe, madje në të gjitha betejat politike ia kemi arritur të jemi triumfues. Ne jemi konfirmuar si parti mbarë kombëtare me shtrirje kapitale në mbarë vendin.
PDIU nuk është vetëm parti e çamëve, nuk jemi parti komunitare apo rajonale, por është parti e çdo shqiptari që beson në kauzën tonë. Të shtunën më 21 maj do të zhvillojmë zgjedhje sipas parimit një anëtar një votë për të gjitha strukturat. Ne nuk kemi frikë garën dhe konkurrencën. Ndaj kudo do të ketë zgjedhje dhe garë, pasi kjo është një parti që ndjek rregullat e lojës. Edhe nga pikëpamja administrative ne do të ngremë sekretariate. Do të forcojmë rolin e gruas dhe të rinisë, dhe do t’i bëjmë pjesë të procesit të kandidimit”, tha Idrizi./a.m.
