Kryeministri Edi Rama, gjatë një takimi me gratë dhe vajzat në Durrës, theksoi progresin e bërë pas tërmetit shkatërrimtar, duke vënë në dukje rindërtimin e lagjes së re “Rilindja” dhe përpjekjet për ta kthyer atë në një zonë moderne rezidenciale.
Ai u shpreh se ende ka disa familje për t’u sistemuar, por pjesa më e madhe e procesit është përmbyllur me sukses.
Kryeministri gjithashtu kritikoi opozitën, duke e krahasuar me “kënetën” dhe duke theksuar se nëse ata do të ishin në pushtet, banorët nuk do të kishin marrë asnjë shtëpi të re.
Rama foli edhe për menaxhimin e krizës energjetike, ku sipas tij, Shqipëria është i vetmi vend që ka ulur çmimin e energjisë me 10.5%.
Kryeministri Edi Rama: Pas tërmetit, ne pak nga pak filluam të hapim dyert e shtëpive të reja, sot kemi ende disa për të sistemuar, por jemi shumë të lehtësuar sepse kemi një lagje krejt të re ‘Rilindjen’. Po punojmë për ndriçimin dhe çdo detaj tjetër që të jetë një zonë rezidenciale.
Nëse nuk do ishim ne në qeveri, por do ishte këneta, sot harrojeni që do kishit marrë shtëpi të reja. Ata kanë dhënë prova. Nëse do të ishte këneta me bufin që e lanë Shqipërinë pa asnjë pavion spitali, imagjinojeni çarë po bëhej me Covidin.
Ne nuk dolëm në luftë me Rusinë, por për një periudhë kur u godit rëndë sistemi i furnizimit me energji elektrike, ne jo vetëm nuk e rritëm një qindarkë çmimin, por e kapërcyem atë krizë dhe jemi i vetmi vend që kemi ulur çmimin e energjisë me 10.5%.
Sot, Durrësi është një kantier që vazhdon me projekte e projekte, që vijojnë.
