Artisti i Popullit Luftar Paja në një intervistë për gazetën “Dita” shpreh jo thjesht për humor pakënaqësi për mosndëshkimin e korrupsionit, qeverisjen dhe veçanërisht për Parlamentin.
Ai thotë për Berishën që duhet të ishte në burg.
“Ka dy vjet e ca që dërdëllit sa t’i dojë qejfi e çfarë t’i dojë qejfi sepse nuk ka Çeçua biçak… Nuk ka kush t’ia bëjë rrup-sup atij e t’ia mbyllë gojën. Ai ka vrarë njerëz, ka djegur e vjedhur Shqipërinë e nuk i ka hyrë gjemb në këmbë. Jo vetëm nuk u dënua dhe s’ka për t’u dënuar, po na bën edhe karshillëk. Na fyen si popull. E drejtë është kjo?”.
Artisti që mban titullin Mjeshtër i Madh thotë që ndihet i zhgënjyer edhe nga ata që votoi në 23 qershor.
“Edhe këta që votuam në 23 qershor para dy vjetëve po na zhgënjejnë dita-ditës, po bëhen si ata. Po më humbet besimi dita-ditës. Po, jam i pakënaqur si me qeverinë dhe me parlamentin. Sidomos me parlamentin. Çfarë pret populli e çfarë llafosin ata”.
“Do më falësh që do përdor një krahasim. Sapo hyjnë në parlament si deputetë ata më janë dukur të mirë e të urtë si dele. Pasi kaloi ca kohë pashë marifetet që bëjnë për t’u marrë vesh me njëri-tjetrin dhe u shndërruan në dhelpra, duke harruar premtimet e fushatës. Tani me ato sharje e fyerje që dëgjoj, them se shndërruar në qenër. Zihen e hahen si qentë… Po kur dalin prej andej, duan të hanë si ujqër…”.
Paja ironizon sjelljen e pushtetarëve me njerëzit që ankohen:
“Populli është shumë i zhgënjyer nga këta politikanë, qofshin të djathtë, qofshin të majtë… E di kush shpikja më e madhe në botë? Celulari. S’ka shpikje më fantastike se celulari. I ke parë deputetët e ministrat kur zbresin nga makinat për të hyrë në parlament apo nëpër zyra? Të gjithë pa përjashtim flasin me celular. E kur u del përpara ndonjë hallexhi që i ka votuar dikur, ata bëjnë vetëm një gjest me dorë si shshsht, si për të thënë se po bëjnë një bisedë shumë të rëndësishme me ata lart… Hallexhiu i shkretë duhet të largohet e ta lërë të qetë…”.
Aktori popullor ka kritika edhe për emisionet televizive që vijojnë prej vitesh me të njëjtat fytyra analistësh në ekran që flasin për të gjitha:
“Qesharakë, si parlamenti, janë bërë edhe emisionet me debate politike në TV. Të njëjtët analistë nga një emision në tjetrin e nga një ekran në tjetrin. Jo vetëm nuk thonë gjëra të mençura, por mua shumë prej tyre më duken budallenj. Ata flasin për gjithçka, për gjithçka”.
“Po pse ore u shua ky vend dhe vetëm ato nja pesë a gjashtë kokrra do na torturojnë natë për natë në televizor? Ku janë specialistët e bujqësisë që të flasin për bujqësinë, ku janë ekspertët e mbrojtjes të na flasin për ushtrinë, ku janë ata të kulturës të na flasin për artin e letërsinë, e me radhë.
Mbylle o popull televizorin. Ashtu siç e mbyll të enjteve… Këta njerëz po ta bëjnë borxh”.
DITA