Identifikohet personi që një ditë më parë i vuri flakën vetes me benzinë në Sarandë. Burime policore bëjnë me dije se viktima është Et’hem Seferaj, 77-vjeç.
Ngjarja është regjistruar rreth orës 17:43, në lagjen nr.4 në qytetin e Sarandës, poshtë rrugës “Mit’hat Hoxha”, brenda rrethimit të një banese.
Djali i viktimës, i pyetur nga policia pas identifkimit nuk ka ditur të tregojë shumë. Mësohet se ai ka shprehur habi lidhur me gjithçka ndodhi, duke thënë se nuk e dinte arsyen e vetëflijimit të babait.
U vetëdogj me benzinë/ Dy të rinjtë tregojnë ngjarjen: Te cepi i murit…
Kanë qenë dy të rinj ata që kanë njoftuar policinë, pasi panë se çfarë po ndodhte në anë të murit, raporton “Panorama“.
Policia ka shkuar menjëherë në vendngjarje, por për shkak të djegieve të shumta trupi ishte shkrumbuar tërësisht dhe personi kishte ndërruar jetë.
Burime të Policisë së Sarandës thanë se në vendin e ngjarjes, pranë trupit të pajetë, është gjetur një kapelë me strehë ngjyrë kafe, nja çakmak, bidoni plastik me mbetje të lëndës djegëse, si ajo e benzinës dhe pak më tej kapaku i bidonit.
Blutë kanë marrë në pyetje banorët e shtëpisë afër së cilës ndodhi ngjarja, por ata kanë mohuar të kenë dijeni rreth këtij personi, ndonëse, sipas të dhënave, ai është thuajse i paidentifikueshëm për shkak të shkallës së djegies.
Gjithashtu janë marrë në pyetje dy djemtë që kanë parë ngjarjen, të cilët nuk kanë arritur të japin ndonjë të dhënë që t’i shërbejë hetimit, pasi ata e kanë konstatuar ngjarjen, pasi viktima i kishte vënë flakën vetes.
Policia bëri të ditur paraprakisht se viktima do të jetë ndonjë punëtor sezonal, por nuk përjashton as dyshimin e ndonjë personi në depresion, për shkak të humbjes së parave në bixhoz. Gjithsesi, deri në momentin e identifikimit këto mbeten pista jozyrtare.a.k
