Kryeministri Edi Rama ka përgënjeshtruar të enjten deklaratën e Kryetarit të Komisionit parlamentar për çështjet e Bashkimit Europian në Bundestagun gjerman, Gunther Krichbaum, i cili më herët tha se ia kishte thënë Ramës në sy që është ende herët që Shqipëria të hapë negociatat.
“Dje mirëprita Kryeministrin e Shqipërisë, Edi Rama në Komitetin për BE-në të Bundestagut gjerman. Këtë mundësi e përdora për t’i thënë personalisht se unë besoj se është ende herët për hapjen e negociatave të anëtarësimit në BE. Reformat në Shqipëri nuk kanë avancuar ende mjaftueshëm”, shkroi Krichbaum në një postim në Facebook ditën e enjte.
Një ditë më parë ai ka pritur në një takim delegacionin shqiptar, të kryesuar nga Kryeministri Edi Rama.
Duke iu përgjigjur interesit të gazetarëve për këtë temë pas kthimit nga Gjermania, Rama tha se “Sa i përket, Krichbaum nuk ma ka thënë këtë gjë, ai është një nga qindra deputetët e Bundestagut, mendimi i tij ka atë peshë që ka, por as nuk më gjen të papërgatitur dhe as nuk më ul kënaqësinë e rezultateve të kësaj vizite.”
a.ç
