Autoritetet italiane kanë vendosur të dëbojnë shqiptarin e akuzuar si rekrutues i luftëtarëve për ISIS, pasi gjykata e liroi për mungesë provash.
38-vjeçari Alban Elezi pritet të riatdhesohet në Shqipëri, pas kërkesës së autoriteteve lokale italiane. Lajmi është publikuar sot në mediat italiane, sipas të cilave “vendimi erdhi pasi gjykata italiane liroi 38-vjeçarin e arrestuar pak kohë më parë në Shqipëri dhe i ekstraduar në Itali me akuzën si rekrutues i luftëtarëve të rinj në ushtrinë e Shtetit Islamik”.
Sipas mediave italiane gjykata italiane ka hedhur poshtë akuzën e Prokurorisë, duke pranuar rekursin e avokatit mbrojtës të Alban Elezit dhe lënien në gjendje të lirë të klientit të tij nga burgu i Kanton Mombello i qytetit të Breshës, ku mbahej i izoluar prej momentit të ekstradimit.
Gjykata ka vleresuar se “ka mungesë provash reale të aftësisë së Alban Elezit në vendosjen e raporteve me ISIS për të garantuar një rekrutim të vërtetë të luftëtarëve të rinj të Shtetit Islamik drejt Sirisë”.
