Saimir Taullau, i cili u arrestua ditën e sotme në Maqedoninë e Veriut për llogari të drejtësisë zvicerane është një person mjaft i njohur për drejtësinë shqiptare dhe jo vetëm. 49-vjeçari nga Lushnja, ku dhe njihet si një biznesmen i fuqishëm, është vëllai i Baki Taullaut, i cili u ekzekutua në vitin 2005, ngjarje për të cilën vetë Saimiri ka akuzuar kreun e bandës së Lushnjes, rivalin e tyre të përjetshëm, Aldo Bare.
Konflikti mes dy bandave ka nisur që në vitin 1997, kohë kur Aldo Bare bënte ligjin në Shqipëri. Në ato vite, Aldo Bare kërkonte që të rekrutonte në bandën e tij Saimir Taullaun, familja e të cilit kishte në pronësi një pikë karburanti dhe disa biznese, por ai refuzoi.
Që nga ky moment, banda e Lushnjes nisi të vendosë gjoba kundrejt familjes Taullau, gjë e cila përfundoi me vrasjen e Baki Taullaut, në vitin 2005, ditën e zgjedhjeve. Bakiu u ekzekutua për 500 mijë euro, por pavarësisht dëshmisë dhe akuzave të ngritura nga vetë Saimir Taullau për Baren, kjo ngjarje ende nuk është zbardhur.
“Vëllai im i kishte paguar disa herë gjobat që grupi i Bares i kishte vendosur, dhe kur ai nuk i pagoi më, atëherë atë e vranë. Natën që po festonim fitoren e zgjedhjeve të qershorit 2005, në sheshin ku ishim mbledhur, erdhi Leonard Prifti me një kapele në kokë dhe një djalë tjetër biond. Prifti qëlloi vëllain tim, Bakiun për vdekje, ndërsa ai ,djali biond, m’u qep mua për të më vrarë. U sulëm nga anë të ndryshme për të shpëtuar dhe më vonë mësova për vrasjet,”- tha në atë kohë Saimir Taullau.
Saimir Taullau është një person me precedentë të theksuar kriminalë. Ai është akuzuar disa herë për vrasje dhe trafik të lëndëve narkotike, por ka mundur të dalë i lirë. Taullau dyshohet edhe se ka pasur të bëjë në vrasjen e Zamir Latifit dhe Jurgen Hoxhës, ngjarje për të cilën është vënë në pranga Orges Bilbili.
Saimir Taullau ka rënë edhe dy herë pre e atentateve. Atij iu bë atentat më 24 nëntor të vitit 2018 në rrethrrotullimin e Plugut, para lokalit të tij, nga i cili shpëtoi me dëme të lehta. Në tetor të vitit 2017, atij iu bë një tjetër atentat, por sërish ai ka arritur të shpëtojë me vetëm një plumb.
g.kosovari
