U raportua si një vdekje natyrale, por Nehat Kulla, i njohur edhe si “Gjenerali”, ka ndërruar jetë për shkak të COVID-19. Dosja.al mësoi ekskluzivisht se mbrëmjen e djeshme, Nehat Kulla i shoqëruar nga një familjar u paraqit në urgjencën e Sanatoriumit me gjendje tepër të rënduar dhe vështirësi serioze në frymëmarrje.
Ai iu nënshtrua skanerit të mushkrisë dhe rezultoi me pneumoni bilaterale intersticiale grada e fundit, imazh tipik sipas mjekëve për COVID 19.
Atij iu mor tamponi dhe iu kërkua shtrimi në spital, por edhe pse në gjendje tepër të rënduar, Nehat Kulla ka refuzuar shtrimin dhe është kthyer në shtëpinë e tij ku ka ndërruar jetë në orët e para të mëngjesit.
67-vjeçari është anëtari i dytë i fisit Kulla, dhe më i rëndësishmi i familjes që shuhet nga virusi. Më 28 prill, i vëllai, Ramazani vdiq pasi ishte infektuar me koronavirus. Kjo do të ishte edhe dalja e fundit publike e “Gjeneralit”, i cili evitonte daljen nga banesa për shkak se vuante nga disa sëmundje.
Por kush ishte Nehat Kulla dhe pse mori nofkën “Gjenerali”
Nehat Kulla njihet nga drejtësia shqiptare si kapoja i një prej bandave më të rrezikshme në Tiranë përgjatë viteve 1997-2000. Ai u dënua me 20 vite burg për vrasjen e shoferit të ish-ministrist të Brendshëm, Halit Shamata, Halim Gjuzit. “Gjenerali”, bashkë me familjen morën nën patronazh repartin “Xhenios” në Tiranë, që ngeli i padëmtuar nga sulmet e 1997-ës. Nehat Kulla thuajse arriti të krijojë një komisariat policie në Kinostudio dhe Tufinë ku ruanin zonën. Ai mori nofkën “Gjenerali”, pasi në 1997, grabiti një kamionçinë ushtarake tip Shevrolet (Chevrolet) me targa ushtrie dhe sinjale policie dhe mbante veshur uniformë ushtarake. Ky mjet unik për kohën në Shqipëri ishte në duart e Nehat Kullës, i cili hoqi mënjanë modestinë për të pozuar para kamerave i veshur si gjeneral me uniformë dhe automatik, të cilin nuk e lëshonte asnjëherë nga dora.
g.kosovari
