Remzije Garunja, nëna e 19-vjeçares Lusinda, e cila mbeti e vdekur kur makina me të cilën po udhëtonte u përplas nga një tjetër makinë, nuk i ka përmbajtur lotët teksa fliste për të bijën.
Në një intervistë për “Shqipëria Live”, ajo tha se e bija kishte dalë me shoqet për të festuar, por iu kthye me arkivol.
“Nuk mendoja kurrë që do ta merrte këtë vendim Gjykata. Na e vrau për herë të dytë vajzën. Dënim qesharak. Ne i kemi falur për gjakmarrje.
Edhe babai i Zhenetës tha në gjykatë se na i vratë vajzat për herë të dytë. Çdo vajzë ka qejf me dalë, më jetu jetën. I kam rritur me halle e telashe. Kam punuar 24 orë me u bërë qejfin vajzave, mos me i çu viktima.
Por njerëzit gjykojnë pse i lëmë fëmijët të dalin, çdo vajzë, 19 vjeçe ka qejf me jetu. Nuk ka një muaj që kam filluar me dalë. E çova për qejf, jo me ardhur në arkivol të ftohtë,”- përfundoi ajo me lot në sy.
Behar Pema në gjendje të dehur aksidentoi për vdekje më 13 shtator 2020 dy vajza të reja Lusinda Garunja, 19 vjeç dhe Zheneta Qellia si dhe plagosi dy të tjerat Denisa Dibra, 25 vjeç dhe Nervina Garunja, 24 vjeç, në Tunelin e Elbasanit. Për këtë ngjarje ai u dënua me 4 vite burg./m.j
