Prej gati 4 muajsh, një person rreth 40 vjeç, është ende i paidentifikuar në qytetin Weymouth të Anglisë.
Ai u shfaq në qytet në muajin shtator në gjendje totalisht të rënduar dhe pa higjienë. Ai i tha policisë se nuk mbante mend asgjë, as nga vinte dhe as kush ishte. Që prej asaj periudhe, policia ka bërë disa apele publike, por ende nuk ka mundur ta identifikojë.
Sipas mediave britanike, ai flet me theks nga Europa Lindore. Komentuesit janë shprehur në rrjetet sociale se ai mund të jetë një emigrant i paligjshëm, i cili vuan nga demenca. “Sa e trishtueshme. Është babai, djali apo bashkëshorti i dikujt”, shkruan një komentues. “Ne ende nuk kemi arritur ta identifikojmë dhe ai nuk ka qenë në gjendje të na thotë se kush është apo të na japë ndonjë detaj për familjen e tij. Ai është nën kujdesin e shërbimit shëndetësor dhe pamja e tij ka ndryshuar disi që prej momentit kur u gjet nga policia”, tha një zyrtar i policisë.
/a.r
