Faza e grupeve të Kupës së Botës 2018 ka mbaruar dhe disa nga ekipet e mëdha nuk arritën t’i kalonin pritshmëritë e admiruesve të tyre. Ndërkohë disa nga ekipet e vogla arritën t’i kalonin të gjitha pritshmëritë e parashikuesve të futbollit.
Ndërsa 27 nga 122 golat e fazës së parë u shënuan në dhjetë minutat e fundit të lojës, kampionia e Botës në fuqi, Gjermania nuk arriti të kualifikohej në raundin tjetër.
Uruguaji, Kroacia dhe Belgjika kanë marrë maksimumin nga grupet e tyre, duke përfunduar me nëntë pikë të plota, ndërsa skuadra e Luis Suarez ka arritur të mbajë të paprekur portën e saj gjatë kësaj faze të turneut.
Anglia arriti të jepte një performancë mëse të denjë me golëshënuesin më të mirë të Botërorit deri tani (5), Harry Kane-it, kurse rivalja e saj historike Franca, u kualifikua me vështirësi. Ndërkohë, Suedia ka arritur të kryesojë një grup kundër Meksikës, Koresë së Jugut dhe Gjermanisë.
Nga ana e tyre, Zvicra, Rusia, Meksika dhe Danimarka kanë arritur të tejkalojnë pritshmëritë dhe të kalojnë në raundin e 1/16-ve, kur askush nuk e priste një rezultat të tillë para Botërorit.
Spanja dhe Portugalia, janë dy skuadra që hynë 
në turne, duke u konsideruar si favorite dhe përkundër barazimit mbresëlënës 3-3, nuk kanë arritur të kënaqin tifozët e tyre. Asnjëra prej tyre nuk i ka entuziazmuar spektatorët, të dyja duke mos fituar në ndeshjet e tyre të fundit në grup, ndërsa “La Roja” arriti të sigurojë vendin e parë me një barazim të vonuar kundër Marokut.
Argjentina e stërmbushur me stres, ka qenë në qendër të vëmendjes gjatë turneut. Lionel Messi u kritikua gjatë fazës së grupeve dhe ekipi pothuajse u skualifikua, por shpëtoi nga një gjuajtje e mrekullueshme nga Marcos Rojo kundër Nigerisë.
Nga ekipet që janë rrëzuar, Gjermania ka vazhduar “zakonin” e një ish-kampioneje bote, duke u eleminuar që në fazën e parë të turneut. Ekipi i Joachim Low përfundoi i fundit në grupin e tij me vetëm tri pikë në tri ndeshje.
Së fundmi, Peruja, Irani, Maroku dhe Koreja e Jugut ishin të vetmet skuadra që treguan në një paraqitje të shkurtër cilësi dhe karakter luftarak, ndërsa duhet të theksohet se asnjë nga ekipet afrikane nuk ka arritur të kalojë në raundin e 1/16-ve.
/marca/atsh/b.d
