“Jam me pushime në Turqi me fëmijët. Nuk e ke idenë sa e qetë jam dhe sa të nevojshme i kisha pasur këto pushime. I kam harruar disa nga ato që kanë ndodhur”. Kjo ishte biseda e një jave më parë që Fildes Hafizi kishte bërë me një mikeshën e saj në telefon, shkruan “Panorama”.
Ajo tregon se 39-vjeçarja dukej më e lumtur, më e qetë. Edhe pse nuk kishte shumë dëshirë të fliste për problemet që kishte me ishbashkëshortin, duket se vendimi i gjykatës dhe lirimi i tij pas ngjarjes së fundit, e kishin mërzitur shumë.
“Ai u dënua 1 vit a diçka më shumë. Po siç janë punët këtu, tani ka dalë”, kështu i është përgjigjur mikeshës së saj 39-vjeçarja, duke mos e zgjatur më shumë bisedën për ish-bashkëshortin.
Pas divorcit me të, Fildesi kishte marrë edhe prindërit në Tiranë. Ata kishin shitur shtëpinë e tyre në Shkodër, ndërsa tani jetojnë me të bijën e fëmijët e saj, në një apartament me qira në zonën e “Xhamllikut”. Fildesi ka vetëm një motër, e cila është e martuar dhe jeton në Tiranë.
Ndërsa, përveç fëmijëve, i duhej të kujdesej edhe për prindërit, të dy pensionistë. Miqtë e saj tregojnë se vendimin për t’u divorcuar Fildesi e mori pasi kuptoi se i shoqi kishte nisur bixhozin.
Çdo ditë i ankohej për borxhe dhe se punët me dyqanin nuk po i ecnin mirë. Ndërsa kishte filluar ta tepronte edhe me pijen, që zakonisht nuk kishte shfaqur probleme për shkak të alkoolit. Por, vitet e fundit ishte bërë më i dhunshëm e më konfliktual./panorama
