Seanca plenare e kësaj të enjte është shtyrë për tu mbledhur më pas, në orën 15:00. Kësisoj Kuvendi ka vendosur që t’i japë më shumë kohë arritjes së një marëveshje mes palëve në lidhje me aktet nënligjore të ligjit për dekriminalizimin.
E ndodhur në mes të tensioneve politike, seanca është ndërprerë për të mos përfunduar në një situatë konfliktuale, ashtu siç edhe është paralajmëruar nga vetë opozita e cila ngulmon në miratimin e propozimeve të tyre për aktet nënligjore.
Pak më parë, pas përfundimit të mbledhjes së grupit parlamentar të PD-së, Edi Paloka tha se opozita nuk do të paraqitet në parlament nëse nuk miratohen propozimet e saj për dekriminalizimin, e veçanërisht formularin e vetëdeklarimit, për të cilën, tha Paloka, PD ka marrë asistencë nga FBI-ja amerikane.
Më herët, ish Kryeministri Sali Berihs ka paralajmëruar për një përshkallëzim të aksionit opozitar, jo vetëm në formën e një bojkoti të parlamentit, por edhe me një ngërç politik.
