U zhduk nga Durrësi tre ditë më parë dhe u denoncua në polici dhe media, por 65-vjeçari u gjet sot te Gjiri i Lalëzit.
Ali Frakulli u denoncua si i humbur, këtë të martë, por pas publikimit të rastit, në emisionin ’Pa Gjurmë’ që merret me të tilla histoir, në Report TV, mjaft telefonata treguan vendndodhjen e tij në qytetin e Durrësit.
Raportohet se 65-vjeçari kishte ndryshuar itinerar dhe kishte përfunduar në Gjirin e Lalëzit, ndërsa u gjet mëngjesin e sotëm rreth orës 03:00 nga policia.
“Babai u gjet tek Gjiri i Lalëzit. Kishte kërkuar ndihmë tek qytetarët, për të ardhur në Tiranë, por nuk e kishte ndihmuar askush. Telefonatat gjatë emisionit thanë të vërtetën, sepse ai ka qenë në Durrës, nga ku ka marrë serum tek ambulanca. Nga nuk ka qenë këto ditë, madje ka shkuar edhe tek banesa ku rrinim në Golem, pasi kishim shkuar për pushime”, tha djali i tij.
Ali Frakulli, u zhduk pasditen së shtunës, më 18 korrik, ndërsa ndodhej me pushime në Golem të Durrësit, me bashkëshorten dhe vajzën. Ai u ngrit papritur nga lokali duke u kërkuar familjarëve se donte të kthehej në Tiranë. Bashkëshortja e ndoqi në këmbë, derisa i shoqi i humbi nga sytë. Familjarët bënë denoncimin në polici, për ta gjetur sot pas tre ditësh.
/a.r
