Gjykata e Apelit ka rritur dënimin ndaj Aldiron Shehut, i riu që plagosi një efektiv policie në Elbasan dhe rrezikoi jetën e katër të tjerëve, gjatë një ndjekje policore ku ai tentoi të shpëtonte nga arrestimi dhe “theu” 7 postblloqe.
Apeli i Durrësit e ka riklasifikuar akuzën e ngritur nga Prokuroria ndaj të riut, duke lënë në fuqi akuzën për “Vrasje të punonjësve të policisë së shtetit mbetur në tentativë”, dhe jo atë të “kanosjes”.
Ndërkohë që ka vendosur dënimin me 15 vite heqje lirie, për akuzën e tentativës së vrasjes së efektivëve.
Ngjarja ndodhi më 4 shkurt të para tre viteve, kur i riu u vu në ndjekje që nga Devolli dhe ngriti në këmbë policinë e Korçës, Pogradecit, Prrenjasit, Librazhdit dhe Elbasanit, ku këta të fundit arritën ta ndalojnë.
Shehu, i cilësuar edhe si “Shumakeri i Gjirokastrës” është ndaluar vetëm në Elbasan, ku 100 metra pasi kishte çarë postbllokun e policisë rrugore dhe kishte goditur një efektiv policie, automjeti që ai drejtonte është përplasur me dy mjete të tjera, dhe për pasojë është përmbysur.
Vetëm në këtë moment, Aldiron Shehu, që i ishte shmangur ndjekjes së policisë nga zona e Devollit, është arrestuar.
Në shkurt të 2020 pas një ndjekje të gjatë rrezikoi jetët e efektivëve të policisë së Elbasanit që ishin pjesë e patrullës së ngritur për ndalimin e tij.
/s.f
