Ambasadori Richard Grenell, ka zhvilluar sot një takim me kryetarin e Lëvizjes Vetëvendosje, Albin Kurti, si i dërguari i posaçëm për dialogun Prishtinë – Beograd i presidentit Donald Trump.
Menjëherë pas këtij takimi, Grenell deklaroi se çështja e krijimit të qeverisë nuk është çështje e tij dhe se nuk i intereson.
“Po i them dy gjëra, i thashë Kurtit që vendet si Britania e Gjermania po e përcjellin situatën. I thamë të ndjekë ligjin nëse do që të arrihet suksesi. E dyta që ia thashë është për çështjet ekonomike. Gjëja më e rëndësishme, krijoni vende pune. Njerëzit janë të interesuar që të ndihmojnë ekonominë këtu, administrata e Trumpit ka qenë mjaft e suksesshme në rritje të ekonomisë duke ju ndihmuar bizneseve përmes qeverisë”, tha ai.
Grenell u shpreh se fokusi i tij është ekonomia, duke marrë shembull suksesin e administratës së Presidentit Trump. Më pas shtoi se apeli i tij është që të punojnë drejt zhvillimit ekonomik dhe se duhet të krijohen vende të reja pune.
Ambasadori Grenell ritheksoi se taksa 100% ndaj produkteve serbe dhe boshnjake duhet të hiqet, ndërsa Serbia nga ana e saj duhet të ndalojë fushatën e saj kundër Kosovës.
g.kosovari
