I dënuari shqiptar si vrasës i avokatit Mihalis Zafeiropoulos ka pozuar nga shtrati i burgut duke pirë cigare dhe me celular në dorë, gjë e cila është e ndaluar për të burgosurit.
“Unë kam lindur vrasës dhe do të vdes një vrasës”, ka shkruar Ibrahim Brahimaj kohët e fundit në rrjetet sociale me një llogari të rremë, raportojnë mediat në shtetin fqinj.
Javën e kaluar Gjykata e Apelit në Athinë e dënoi me burgim të përjetshëm për vrasje dhe 11 vjet shtesë për dy grabitje me dhunë.
Po ashtu edhe dy bashkëpunëtorët e tij, Oldi Dulce dhe Klodian Lekocja, u dënuan me burg të përjetshëm për vrasjen e avokatit.
Vendimi i gjykatës ishte unanim, me gjyqtarët dhe juristët duke pranuar në thelb propozimin e bërë më herët nga kryeprokurori, Spyros Pappas.
E veja e avokatit, pas vendimit edhe pse tha se asgjë nuk ndryshon, falenderoi drejtësinë greke për vendimin.
“Faleminderit drejtësisë Greke dhe jurisë. Për fat të keq asgjë nuk mund ta rikthejë Michalis. Kjo nuk do të ndryshojë asgjë në jetën e tyre sepse ata ishin në burg, ata janë në burg dhe ata do të jenë në burg. Kjo nuk do të ndryshojë asgjë për ta dhe fatkeqësisht për mua dhe fëmijët e mi”, tha Vicky Zafeiropoulos.
/a.r
