Sulmuesi i Kombëtares shqiptare, Myrto Uzuni, po kalon një formë të shkëlqyer me Granadën në Spanjë.
Bomberi kuqezi ka shënuar tre gola në ndeshjen ndaj Kartagjenës, duke e vulosur rezultatin në 4-1 për skuadrën e tij, e cila po lufton për t’u rikthyer në La liga.
Me këto tre gola, Uzuni shkon në kuotën e 14 realizimeve këtë sezon me Granadan në 16 ndeshje, ku ka dhuruar edhe një asist.
14 golat e shënuar e kanë bërë sulmuesin beratas, i cili në këtë sezon ka mbajtur në disa ndeshje edhe shiritin e kapitenit te Granada, idhullin e tifozëve vendas.
Të gjithë janë të çmendur pas Uzunit dhe këtë e vërteton më së miri rrugëtimi që një tifoz i Granadës nga Argjentina, ka ndërmarrë për të takuar idhullin e tij më të madh.
Vogëlushi nga provinca e Tukaman në Argjentinë ka përshkruar mbi 11.600 kilometra për të parë nga afër duke luajtur sulmuesin kuqezi në stadiumin e skuadrës së tij të zemrës.
Dhe lodhja e mundimi ja vlejtën pasi Granada ia plotësoi ëndrrën djaloshit argjentinas për të takuar nga afër Myrto Uzunin pas ndeshjes me Kartagjenën, ku sulmuesi shënoi një tripletë.
Në ambientet e jashtme të stadiumit “Nuevo Estadio de los Carmenes”, Uzuni u ndal të përqafonte fansin e tij të çmendur, duke shkëmbyer një bisedë të shkurtër me të, e duke shfaqur shumë afrimitet.
Bomberi kuqezi i ka firmosur edhe fanellën me numrin 10 që djaloshi argjentinas mbante veshur, duke plotësuar kështu një natë të mrekulleshme për të dy, me emocione të papërshkrueshme.
Sakaq Uzuni në përfundim të sfidës ku tundi tre herë rrjetën u bë protagonist pasi këndoi në kor himnin e tifozëve të Granadas me fansat që e duan dhe e adhurojnë tashmë.
Ai ishte dirigjenti i korit dhe me pasion këtë detyrë e përmbushi me përsosmëri deri në fund, ndërsa shokët e tij të ekipit e ndoqën me adhurim.
