“Loja e shahut” me tri drejtime midis PSG, Barcelonës dhe Neymar vazhdon. Ka pothuajse ndonjë gjysmëlëvizje të qartë, por prapa skenave operacioni “zien”. Secili “aktor” është në rolin e tij, duke mbajtur pozicionin zyrtar. Megjithatë, të gjithë e kuptojnë se do të duhet të lëvizin nga pozicionet e tyre fillestare, nëse dëshirojnë që ky operacion të realizohet. Te Barça e dinë mirë se PSG do të preferonte që braziliani të mos përfundonte me fanellën azulgrana, por e kuptojnë se ekziston ende një mundësi minimale për ta kryer këtë operacion. Strategjia katalanase është e qartë, të qëndrojnë në pritje, me shpresën se kalimi i ditëve do të bëjë që operacioni “të piqet”.
Sidoqoftë, Neymar ka filluar të dëshpërohet. Ai po e vuan shumë faktin se fillimi i sezonit të ri sa vjen dhe afrohet, ndërsa është akoma në radhët e skuadrës pariziene. Nga këndvështrimi i sulmuesit brazilian është e nevojshme që Barcelona të bëjë një gjest, të zyrtarizojë një ofertë, qoftë edhe sa për sy e faqe. Një veprim, që e detyron PSG-në të “shqiptohet” (prononcohet). Ky është sinjali që braziliani po pret nga katalanasit, që të fillojnë të bëjnë presion të vërtetë ndaj Al-Khelaïfi.
PSG, nga ana tjetër, beson se koha luan në favor të vet. Kampionët e Ligue 1 ishin të parët, që thanë se Neymar i kishte dyert e hapura, nëse me të vërtetë dëshironte të largohej, por besojnë, po ashtu, se me të në radhët e tyre, ata janë ekip më i fortë. Parizienët besojnë që, nëse çështja nuk evoluon dhe sezoni fillon pa ndryshuar e ardhmja e Neymar, lojtari do t’i përmbushë pritshmëritë si profesionist. Përveç kësaj, ekziston problemi i egos në dhomën e zhveshjes së PSG, në të cilën Kylian Mbappé ka filluar të pretendojë fronin e më të mirit. Talenti francez dëshiron të jetë lideri i ekipit dhe e di se me Neymar, duke u përplasur me brazilianin, gjithçka do të jetë më e vështirë.
Në rast se e gjitha kjo “telenovelë” mbetet pa asnjë zhvillim konkret, pra Neymar qëndron në Paris, në ekipin kryeqytetas do të bëhet një përpjekje për të qetësuar shpirtrat dhe për ta ulur tensionin në minimum. “Le Parisien” informon se strategjia e klubit galik është që deklaratat publike mbi këtë temë të pushojnë dhe gjithçka të zgjidhet brenda familjes. Në thelb, kjo ka të bëjë me rehabilitimin e imazhit të Neymar, në rast se ky i fundit qëndron dhe duhet të ribashkohet me tifozët e “Parkut të Princave”.
Në këtë drejtim, së shpejti do të zhvillohet një takim i Leonardos me Neymar për të provuar paqtimin mes palëve. Në të, drejtori sportiv i PSG do të tregojë lehtësinë për të hedhur pas krahëve gjithçka ka ndodhur së fundi. Një takim, para të cilit lojtari do të donte një ofertë zyrtare nga katalanasit, për të provuar ta shtrëngonte pak më shumë litarin…
Neymar është tepër i prirur për ta lënë PSG dhe të rikthehet te Barcelona. Si Verratti në atë kohë, ai ndjehet i burgosur nga sheiku dhe ka besim se Barcelona do të vijë në shpëtimin e tij. Sidoqoftë, katalanasit janë të qartë se nuk mund të bëjnë asnjë çmenduri, apo të lënë kokën për një lojtar, që i braktisi dy vite më parë. Neymar iu intereson, po, është e vërtetë; por jo me cilindo çmim./telesport
g.kosovari
