Kur janë numëruar 99,84% të votave, Demokracia e Re ka siguruar bindshëm dominimin dhe fitoren në garën për të drejtuar Greqinë.
Demokracia e Re ka marrë 39,85% të votave ose thënë ndryshe 158 deputet. Partia SYRIZA e Alexis Tsipras ka marrë 31,53% ose 86 ulëse në parlamentin grek. Partia e tretë renditet PASOK me 22 ulëse në parlament. Ndërsa Agimi i Artë përfundimisht ka mbetur jashtë.
Kyriakos Mitsotakis, kryeministri i ri i Greqisë, ka shërbyer në krye të opozitës që nga viti 2016 dhe tashmë ia arriti që të rrëzojë Tsiprasin dhe të marrë drejtimin e Greqisë. Ndërsa ditën e sotme rreth orës 13:00 do të bëjë edhe betimin e tij si kryeministër.
Kryeministri Alexis Tsipras pranoi humbjen në zgjedhjet e së dielës dhe telefonoi menjëherë rivalin e tij konservator Kyriakos Mitsotakis, për ta uruar për fitoren.
Kyriakos Mitsotakis, i biri i ish kryeministrit grek dhe vëlla i ish ministrit të Jashtëm grek, është zotuar ta bëjë Greqinë më miqësore ndaj bizneseve, të tërheqë investime të huaja, të modernizojë burokracinë greke dhe të ulë taksat, raporton Voa.
Mitsotakis, një student i diplomuar në McKinsey në SHBA, dhe djali i një ish-kryeministri, tha se do të përqendrohet së pari në uljen e taksave, reduktimin e burokracisë dhe tërheqjen e investimeve të huaja për të krijuar vende pune dhe për të ndaluar migrimin e të rinjve profesionistë jashtë vendit.
Mitsotakis pritet të njoftojë kabinetin e tij të hënën. Ai tha se do të përfshinte “njerëz të brezit tim”, duke përfshirë edhe teknokratët pa një sfond në politikë dhe personalitetet greke nga qendra e majtë.
g.kosovari
