Hyseni: 46 kosovarë të vdekur në luftërat në Siri e Irak
Luftërat në Siri e Irak morën jetën e 46 kosovarëve dhe kjo duhet të jetë shqetësim i të gjitha niveleve në vend, si atyre qendrore, ashtu edhe lokale. Kështu u shpreh ministri i Punëve të Brendshme, Skënder Hyseni, gjatë vizitës në Komunën e Prishtinës, ku ka përsëritur shqetësimet e tij lidhur me shkuarjen e kosovarëve në luftëra të huaja.
Hyseni në takimin me Këshilli komunal të kryeqendrës për Siguri në Bashkësi ka theksuar se, sipas Departamentit të Antiterrorizmit të MPB-së, pre e ideologjive militante fetare janë kryesisht të rinjtë.
Shqetësim tjetër i shprehur në takimet në komunën e Prishtinës ishte edhe siguria e shoqërisë së Kosovës, ku u kërkua që të rritet numri i policëve në qarkullimin rrugor.
Ministri i Brendshëm tha se Këshilli komunal për Siguri në Bashkësi dhe anëtarët e këtij këshilli janë zërat më të mirë për të dërguar mesazhin vetëdijësues kundër ekstremizmit.
“Të dhënat që bashkëpunëtorët e mi më ofrojnë flasin për diku rreth 300 luftëtarë të huaj nga Kosova që kanë marrë pjesë në luftërat në Siri e Irak në faza të ndryshme, jo aktualisht, por që nga fillimi… Po ashtu kemi një shifër shqetësuese për numrin e qytetarëve të Republikës së Kosovës që deklarohen si të vdekur në Siri e Irak, nuk po them që deklarohen si të vrarë, sepse pak dihet për mënyrën si kanë vdekur ata njerëz, por dihet që kanë vdekur dhe janë 46 persona sipas informacioneve të fundit. Këto shifra vetvetiu do të duhej të ishin shqetësuese dhe do të duhet të paraqesin shqetësim për institucionet e Republikës së Kosovës në të gjitha nivelet, edhe në nivel qendror edhe nivelin lokal…Ky këshill dhe anëtarët e këtij këshilli janë zërat më të mirë, për të dërguar një mesazh vetëdijësimi kundër ekstremizmit”, tha Hyseni.
Lidhur me shqetësimin e shkuarjes së kosovarëve në luftërat e huaja, drejtori i Departamentit për antiterrorizëm, Fatos Makolli, thotë se ideologjia ekstremiste në Kosovë është bazuar në keqinterpretimet e Kuranit.
Sipas Makollit, këto janë në kundërshtim me vlerat dhe traditat e shoqërisë sonë, ku edhe përkundër rezistencës së popullatës kryesisht të ndjenjave të traditës, pre e kësaj ideologjie janë të rinjtë kosovarë.
“Ne të gjithë i dimë, që prej viteve të para të pasluftës, tendencat për importimin e ideologjive ekstremiste në Kosovë, kryesisht ideologji këto të bazuar në keqinterpretime të Kuranit apo në islamin, të islamit radikal politikë që kryesisht kanë qenë në kundërshtim edhe me vlerat edhe me traditat edhe me normat tona si shoqëri. Me gjithë rezistencën, që ka qenë një rezistencë shumë e madhe e popullatës sonë, kryesisht për shkak të ndjenjës të traditave të forta të ndjenjës së përkatësisë kombëtare që ka mbizotëruar gjithmonë te ne, megjithatë pjesa më e cënueshme e shoqërisë ka rënë pre e këtyre ideologjive dhe janë kryesisht të rinj”, tha Makolli.
Ministri Hyseni ka realizuar takime me kryetarët e komunave dhe këshillat komunalë për Siguri në Bashkësi në gjithë Kosovën, që në këtë mënyrë të dëgjohet për nevojat e komunave në rrafshin e sigurisë, mbi të gjitha dhe në mënyrë specifike në rastin e policimit./KosovaPress
