Elseid Hysaj do të rinovojë me Napolin menjëherë pas kthimit nga kombëtarja, duke vendosur në kontratë edhe një klauzolë lirimi, por që vlen vetëm për jashtë Italisë. Këto i ka bërë të ditura Mario Giuffredi, agjenti i lojtarit kuqezi.
“Hysaj do të rinovojë. Napoli kishte disa prioritete të tjera deri dje, ne kërkuam të firmosnim para ndeshjes me Milanin, pasi djaloshi donte të shkonte i qetë në grumbullimin me kombëtaren, por nuk u gjet mundësia, axhenda ishte tepër e ngjeshur. Kur të kthehet, do të rinovjmë”, thotë Giuffredi.
Agjenti flet edhe për klauzolën e lirimit, por pa dhënë shifra.
“Klauzola do të vendoset në kontratë, pastaj Napoli mund ta bëjë të ditur nëse dëshiron. Unë mund t’ju them vetëm se nuk i kalon 60 milionë euro dhe do të jetë e vlefshme vetëm për jashtë (Italisë). De Laurentiis dëshiron të shmangë një tjetër rast Higuain”.
d.i.
