“Një klub si Napoli nuk është maksimumi në karrierë për një mbrojtës si Elseid Hysaj”.
Është ky mendimi i menaxherit të futbollistit shqiptar, Mario Giufreddi, i cili në një prononcim për mediat italiane foli me superlativa për 21-vjeçarin nga Shkodra. Hysaj ka shkëlqyer me fanellën e Napolit në këtë sezon duke rezultuar një nga mbrojtësit e djathtë më të spikatur në Serinë A italiane. Sipas menaxherit të Hysajt, mbrojtësi i Kombëtares Kuqezi i ka të gjitha mundësitë që në verën e ardhshme të transferohet në një klub të madh europian.
“Hysajn e njoh prej shumë vitesh dhe e dija që do të bënte shumë mirë edhe në një klub të rëndësishëm si Napoli. Pastaj gjërat janë thjeshtësuar disi për Elseidin edhe për shkak të Sarrit që i njeh shumë mirë cilësitë e tij. Në ndryshim nga 6 muaj më parë vlera e tij në merkato është rritur ndjeshëm, kështu që në verë Hysaj do të jetë një emër shumë i përfolur në merkato. Unë jam i bindur që Hysaj i ka të gjitha cilësitë për të luajtur në një klub të madh dhe nëse në verë në drejtim të Napolit vjen një ofertë e rëndësishme të kaltërit do ta marrin në konsideratë. Cdo gjë në futboll e ka një çmim. Kur flas për klube të mëdha i referohem Realit të Madridit apo Chelsea-it, sepse klienti im i ka të gjitha mundësitë për t’u përmirsuar akoma edhe më tepër dhe për të bërë një hap të madh përpara”.
Edhe pse për 21-vjeçarin shqiptar interesohen disa klube të mëdha, sipas Giufreddit aktualisht Hysaj është i përqëndruar vetëm te Napoli.
“E di që ai po ndiqet me vëmendje nga shumë klube, por për momentin ne nuk mendojmë për merkaton. Elseidi dëshiron të bëjë mirë te Napoli dhe të qëndrojë me këmbë në tokë. Pastaj interesimi i klube të mëdha vjen si rrjedhojë e paraqiteve të mira të lojtarit. Hysaj ka 5 vite kontratë me Napolin dhe unë për momentin nuk kam ndërmend t’u kërkoj drejtuesve një rritje page për klientin tim. Në fund të sezonit do të kuptojmë se çfarë do të ndodhë me lojtarin. Tashmë e vetmja gjë që duhet të bëjë Hysaj është të qëndrojë i qetë dhe të punojë fortë”.
Për të blerë kartonin e Elseid Hysajt nga Empoli verën e kaluar, Napoli shpenzoi 5 milionë Euro, por tashmë vlera e 21-vjeçarit shqiptar në merkato sipas faqes së specializuar Transfermarkt.de ka kapur shifrën e 9 milionë Eurove dhe mund të rritet akoma edhe më shumë nëse lojtari vazhdon të paraqitet mirë.
Supersport
