Trupi i pajetë e Eljon Hysës, 34-vjeçarit që ishte shpallur në kërkim nga policia për vrasjen e një personi në vitin 2015 u gjet sot i groposur pranë varrezave të Niklës.
Ai ishte vrarë me një plumb në kokë me një pushkë sipas burimeve nga grupi hetimor. Më pas edhe u gropos për të mos u gjetur. Ekspertiza pritet të hedhë më shumë dritë nëse viktima është torturuar para krimit.
Nuk dihet ende se si u arrit të gjendej vendi ku ishte groposur Hysa. Kujtojmë se Hysa para pak ditësh u denoncua si i zhdukur nga familjarët të cilët hodhën dyshime se mund të ishte vrarë, dyshime që për fat të keq rezultuan të vërteta.
Hysa ishte shpallur në kërkim për vrasjen e pronarit të një lavazhi në Sarandë në vitin 2015, shtetasit Edmond Theodhorit shkruan JavaNews. Por, për momentin grupi hetimor përjashton pistën e hakmarrjes nga të dhënat e siguruara deri tani.
Hetimet janë përqendruar në dy pista që lidhen me një borxh të pashlyer si dhe me përfshirjen e mundshme të 34-vjeçarit në një konflikt për çështje të trafikut të drogës.
“Grupi hetimor ka bllokuar një sërë provash materiale duke bërë të mundur identifikimin e autorëve të dyshuar ku njëri prej tyre, shtetasi H.R. është shoqëruar në ambientet e Komisariatit të Policisë Krujë dhe është shpallur në kërkim shtetasi A.T.”, raportoi policia pas gjetjes së trupit të pajetë./a.m.
