Tri ditë më parë emigranti, Apostol Naka është njoftuar nga fqinji se kishte parë një prej dritareve të thyera të banesës dhe dyshonte për grabitje. Menjëherë, Naka u nis nga Italia ku jeton por kur ka hapur derën ka parë se gati e gjithë shtëpia ishte boshatisur nga hajdutët.
“Hyra në shtëpi dhe pashë se ishte vjedhur çdo gjë duke nisur nga televizori, pikturat dhe deri te enët e kuzhinës apo peshqirët”, tregon ai.
Sipas tij ajo që e shqetëson më shumë është vjedhja e armës që i kishte lënë i ati.
“Ky hajdut ka vjedhur dhe armën me leje që më ka lënë babai, një pushkë funksionale së bashku me municionet”, thotë Naka.
Sipas tij, ky hajdut tashmë është shumë i rrezikshëm pasi po qarkullon i armatosur ndërkohë që ka bërë të gjitha denoncimet përkatëse, raporton “BalkanWeb”.
Pas blerjes përsëri të një pjese të gjërave të vjedhura, ai është shprehur se, “masa e vetme që mund të marrë është ajo e kthimit të shtëpisë në burg duke vendosur kangjella kudo”./a.k
