Ministria e Financave ka miratuar një udhëzim të ri, i cili rrit me 25% çmimet e referencës që përdoren nga Doganat për zhdoganimin e automjeteve të përdorura, përfshirë autoveturat, kamionçinat, furgonët dhe kamionët.
Çmimet e referencës përdoren në rastet kur automjeti ka vit prodhimi më të hershëm se viti i fundit i publikuar në buletinet zyrtare të çmimeve, si “Quattroroute”, “Tuttotrasporti”, “Schwackeliste” etj., të cilat pasqyrojnë çmimet e shitjes në tregjet europiane.
Ndryshimet parashikohen në Udhëzimin Nr. 26, datë 17.12.2025, “Për disa shtesa dhe ndryshime në udhëzimin nr. 3, datë 23.1.2018, ‘Për vlerësimin e mallrave për qëllime doganore’”, i cili hyn në fuqi pas botimit në Fletoren Zyrtare.
Rritja e çmimeve për autoveturat
Sipas udhëzimit të ri, pragu minimal i vlerësimit doganor për autoveturat rritet si më poshtë:
- Deri në 1400 cc: nga 130 mijë lekë në 162.500 lekë
- Nga 1400 deri në 1900 cc: nga 200 mijë lekë në 250.000 lekë
- Nga 1900 deri në 2500 cc: nga 325 mijë lekë në 406.000 lekë
- Nga 2500 deri në 3000 cc: nga 400 mijë lekë në 500.000 lekë
- Nga 3000 deri në 4500 cc: nga 500 mijë lekë në 625.000 lekë
- Mbi 4500 cc: mbetet e pandryshuar në 1.000.000 lekë
Rritja e çmimeve për kamionçinat, furgonët dhe kamionët
Rritja me 25% aplikohet edhe për mjetet e transportit të mallrave, sipas kapacitetit mbajtës:
- Deri në 1.5 tonë: nga 400 mijë lekë në 500.000 lekë
- Nga 1.5 deri në 3.5 tonë: nga 600 mijë lekë në 750.000 lekë
- Nga 3.5 deri në 10 tonë: nga 850 mijë lekë në 1.062.500 lekë
- Nga 10 deri në 15 tonë: nga 1 milion lekë në 1.250.000 lekë
- Mbi 15 tonë: nga 1.2 milion lekë në 1.500.000 lekë
Çfarë ndryshon në praktikë
Me këto ndryshime, Doganat nuk do të mund të pranojnë një vlerë zhdoganimi më të ulët se këto pragje minimale për automjetet e përdorura me vit prodhimi më të hershëm se viti i fundit i pasqyruar në buletinet zyrtare të çmimeve.
Gjithashtu, me hyrjen në fuqi të udhëzimit të ri, pika 18 e udhëzimit të mëparshëm shfuqizohet.
