Filmimet kanë treguar pasojat e sulmeve me raketa të militantëve të grupit jemenas Huthi ndaj qytetit saudit Xhizan, pranë kufirit mes dy vendeve.
Sulmet, që shkaktuan zjarre masive dhe shtëllunga gjigante tymi, ishin hakmarrje për goditjet ajrore saudite mbi portin e Hodeidës. Përplasjet nisën më herët këtë javë, pasi militantët nga Jemeni vendosën të bllokonin kalimin e anijeve saudite në ngushticën Bab el-Mandeb, në Detin e Kuq, duke nxitur sërish rritjen e çmimeve të naftës në bursa.
Ndërsa amerikanët, për herë të parë pas 13 netësh radhazi, nuk kryen bombardime në Iran. Nga Shtëpia e Bardhë, Presidenti Donald Trump njoftoi vazhdimin e negociatave me Teheranin përmes ndërmjetësimit të Omanit, por paralajmëroi se ushtria amerikane mbetet e përgatitur për sulme akoma më të rënda nëse bisedimet dështojnë.
“Ne po flasim me ta dhe mendoj se janë më seriozë se kurrë, por kjo nuk do të thotë se kemi arritur një marrëveshje. Ekziston një zgjidhje ushtarake, ku mund të vazhdojmë me një dozë edhe më të rëndë për të shkatërruar gjithçka që kanë, ose një strategji më e mençur për një marrëveshje. Jemi të gatshëm për çdo skenar”, deklaroi Trump.
Në ujërat e Gjirit të Omanit, ushtria amerikane goditi dhe ndaloi një tjetër anije cisternë që tentoi të thyente bllokadën detare ndaj porteve iraniane. Ndërkaq, Uashingtoni dhe Londra po përgatitin një konferencë urgjente javën e ardhshme për sigurinë në ngushticën e Hormuzit, përpara takimit të parashikuar në Uashington mes Presidentit Trump dhe kryeministrit izraelit Benjamin Netanyahu.
