Çdo ditë, Janos Gyorgy Szeredi ngrihet në orët e para të mëngjesit për të udhëtuar.
Udhëtimi i tij i përditshëm është emblematik duke iu bashkuar kështu të rinjve hungarezë që po largohen nga atdheu i tyre për mundësi më të mira brenda BE-së. Szeredi, një kuzhinier 47-vjeçar, kujton kohën para se Hungaria të anëtarësohej në BE, kur udhëtimi në Austri ishte një proces më kompleks.
Janos Gyorgy Szeredi, kuzhinier hungarez: Ne nuk ishim anëtarë të BE-së atëherë, më duhej të merrja një vizë, më duhej të shkoja në ambasadën austriake në Budapest dhe duhej të kaloja një provim gjuhe.
Pavarësisht sfidave, Szeredi dhe të tjerë si ai kanë gjetur se puna në vendet e tjera të BE-së ofron paga dhe kushte më të mira.
“Këtu është më e pastër dhe më e rregullt”, shprehet ai.
Trendi i emigrimit të të rinjve po shkakton shqetësim për stabilitetin e ardhshëm demografik dhe ekonomik të Hungarisë. Në dhjetor, hulumtimi i kryer nga Fondacioni hungarez “OTP Fay”, një organizatë e përqendruar te të rinjtë, tregoi se tre të katërtat e të rinjve hungarezë të moshës 16 deri në 24 vjeç e panë të vështirë sigurimin e punësimit.
Janos Gyorgy Szeredi, kuzhinier hungarez: Këtu më trajtojnë si njeri dhe askush nuk më flet keq, nuk është si në Hungari. Këtu ka njerëz nga disa vende, dhe ata punojnë krah njëri-tjetrit bukur, pa asnjë problem dhe nuk ka situata stresuese.
Për më tepër, gjysma e të anketuarve parashikuan se pas një dekade do të punonin jashtë vendit. David Juhos, një student hungarez 20-vjeçar që studion në Vjenë, shprehet se kjo ishte ajo që të rinjve u duket tërheqëse për BE-në, lëvizja e lirë e mallrave, shërbimeve dhe njerëzve.
Megjithatë, ai shprehu shqetësimin për drejtimin politik që po merr Hungaria nën kryeministrin Viktor Orban, pavarësisht se ata janë në BE.
David Juhos, student hungarez: Në sytë e mi, është një bashkim i mirë që promovon bashkëpunimin mes vendeve. Dhe mendoj se aspekti më i rëndësishëm, të paktën për mua, i BE-së është lëvizja e lirë e mallrave, shërbimeve dhe njerëzve. Kjo e bën shumë të lehtë të lëvizësh jashtë vendit, të studiosh jashtë vendit, të përjetosh shumë kultura të ndryshme, pa asnjë debat apo çështje vizash. Atmosfera në Hungari është bërë e zymtë dhe mendoj se kjo është arsyeja kryesore pse kaq shumë të rinj largohen.
Klima politike në Hungari është një tjetër çështje që hedh hije mbi vendin. Orban ka qenë prej kohësh në mosmarrëveshje me aleatët e tij në BE dhe Uashingtonin për një sërë çështjesh, duke përfshirë refuzimin për të dërguar armë në Kiev dhe ruajtjen e lidhjeve ekonomike me Moskën që kur forcat ruse nisën agresionin rus në Ukrainë në vitin 2022.
BE-ja ka akuzuar qeverinë e Orban për minimin e sundimit të ligjit, lirisë së medias dhe të drejtave të pakicave, me reformat e sundimit të ligjit që rezultuan në pezullimin e fondeve të BE-së në vlerë miliarda euro për Hungarinë. Mosmarrëveshja ka çuar në veprime ligjore nga BE dhe ka tensionuar marrëdhëniet e Hungarisë me bllokun.
/a.r
