Kryeministri Edi Rama i është përgjigjur me ironi pyetjes së gazetarëve lidhur me tezën e një “përplasje” mes klanesh në PS.
Pyetja që iu drejtua kreut të mazhorancës kishte të bënte me aludimet se Erion Veliaj dhe Fatmir Xhafaj planifikuan goditjen e njerëzve të PS, si Arben Çuko, Arben Ndoka dhe Vangjush Dako.
Por me doza humori, Rama tha se ishte i “shqetësuar”, pasi për më tepër, në krye të këtij “komploti” është kryebashkiaku i Tiranës, Erion Veliaj dhe ish-ministri i Brendshëm.
Por shefi i ekzekutivit u përgjigj:
“Do të bëjmë një gjyq popullor ku do të ketë dënime shumë të rënda. Internime dhe punë të detyruar. Dhe koka e komplotit padyshim që është kreu i Bashkisë Tiranë, i mbështetur nga ish-ministri Fatmir Xhafaj. Ka një studim të doktoreshë Monika Kryemadhit për goditjen e qeverisë. Ju siguroj që ky grup armiqësor nuk e ka të gjatë. Erion Veliaj mund të mbjellë pemë sa të dojë, por një ditë do ta varim në një nga këto pemë. Këto do pasqyrohen tek vepra ime numër 21” – tha Rama me ironi.
I pyetur për një rikthim të mundshëm të Saimir Tahirit në PS, shefi i mazhorancës tha që gazetarët duhet t’i kërkojnë falje sëpari atij.
Rama tha se rikthimi apo jo në parti i Tahirit është një proces që nuk i përket të tashmes.
“Derisa Prokuroria të mbyllë cështjen, Tahiri nuk është pjesë e PS” – tha Rama.
/a.rada/javanews
