Detaje të tjera janë publikuar lidhur me ngjarjen tragjike të ndodhur ditën e djeshme në Librazhd, ku një 29-vjeçar, Toni Hidri, ka pësuar infarkt në momentin që i ka dhënë lamtumirën në ceremoninë e varrimit të gjyshes, duke gjetur vdekjen e menjëhershme.
Sipas të afërmve, të cilët kanë mbetur të shokuar nga ajo që kanë parë dhe kanë dëgjuar, Toni ishte shumë i lidhur me gjyshen e tij, shkruan Panorama.
Toni është rritur nga gjyshja e tij, pasi prindërit kanë qenë të ndarë, gjë që shpjegon edhe lidhjen e madhe dhe dashurinë që kishte me nënën e tij.
Ka qenë ky shkaku i një emocioni të fortë që Toni ka përjetuar gjatë varrimit, që sipas mjekëve mund t’i ketë shkaktuar infarktin.
Mjekët thonë se Toni ka pasur tension të lartë e menjëherë i ka rënë infarkt, duke gjetur vdekjen e menjëhershme pa mundur të dërgohej në spital.
Të afërmit dhe miqtë e tij e kujtojnë atë si një djalë të mbarë e të mirë edukuar, e kjo sipas tyre falë gjyshes së tij që e rriti me dashuri. Prej shumë kohësh, Toni emigroi drejt Belgjikës tek i vëllai i tij, por sërish u kthye në qytetin e Librazhdit te gjyshja e tij, ku punonte si kamerier në lokalin në pronësi të dajës së tij.
Banorët e Librazhdit thonë se ishte pikërisht gjyshja e Tonit arsyeja që ai braktisi Belgjikën dhe u rikthye në atdheun e tij.
Ndërsa gjyshja e Tonit është varrosur mesditën e së enjtes, ceremonia mortore e djalit të ri do të kryhet sot në mesditë.
Kjo ndarje para kohe nga jeta ka shokuar mbarë qytetin e vogël të Librazhdit, ngjarje që sipas tyre nuk ishte dëgjuar ndonjëherë në këtë zonë./a.m.
