Ish-portieri i Gjermanisë dhe Manchester Cityt, Eike Immel, ka rrëfyer historinë e rrënimit të tij financiar, pasi humbi mbi 11.5 milionë euro në bixhoz, duke kaluar nga jeta luksoze në varfëri të thellë.
Karriera e Immel zgjati nga viti 1978 deri në 1997, ku ai shkëlqeu me fanellën e Borussia Dortmund dhe Stuttgart, duke fituar Bundesligën dhe përfaqësuar Gjermaninë Perëndimore në 19 ndeshje ndërkombëtare. Ai ishte pjesë e skuadrës që fitoi Kampionatin Evropian 1980 dhe mori pjesë në dy Kupa Bote si portier rezervë.
Por jeta e 64-vjeçarit sot është krejt ndryshe. Në gusht, një gjykatë gjermane e dënoi me dy vjet e dy muaj burg, pasi nuk kishte kthyer më shumë se 100 kredi bankare. Ai ende nuk e ka nisur dënimin dhe aktualisht jeton në banesa sociale në qytetin e lindjes, Stadtallendorf, ku punon vullnetarisht si trajner portierësh për të rinjtë lokalë.
Në dokumentarin gjerman “Armes Deutschland” (Gjermania e Varfër), Immel tregoi për rënien e tij dramatike dhe hapi derën e apartamentit të vogël ku jeton sot. Ai pranoi se nuk e pastron kurrë shtëpinë, sepse ka humbur çdo motivim, por shpreson që një ditë të rikthehet në një jetë më të mirë.
“Më parë fitoja miliona, por tani jetoj me vetëm 489 euro në muaj. Shteti ndihmon njerëzit që janë në nevojë, dhe duhet ta pranoj se pa këtë ndihmë nuk do të mbijetoja”, tha Immel.
“Kam humbur mbi 10 milionë euro në kumar. Më trajtonin me privilegje kudo që shkoja. Restorantet më jepnin tavolinat më të mira, shitësit e makinave më bënin ulje, pagat më rriteshin çdo vit. Kur u transferova te Manchester City, fitoja gati një milion euro në vit.”
Por pasuria u shua shpejt. “U divorcova, fëmijët duhej të kujdeseshin siç duhet, pastaj bëra investime të këqija në pasuri të paluajtshme dhe dhurova shumë para. Ne nuk kursyem kurrë për asgjë”, përfundoi ai, duke treguar me nostalgji disa fotografi të vjetra nga koha kur ishte një yll i futbollit europian. (
