Një 16-vjeçare shqiptare në Greqi, ka humbur gjurmët që prej mbrëmjes e së hënës, duke bërë që familjarët e saj të kërkojnë ndihmë për gjetjen e saj.
Bëhet fjalë për të miturën Emilia Veliu, 16 vjeçe, e cila jeton me familjen e saj në zonën Petralona, Greqi.
Njoftimi për humbjen e saj e ka bërë dhe faqja zyrtare “Buzëqeshja e Fëmijës” në Greqi, që raporton çdo humbje të mituri në vendin fqinjë.
Emilia ka flokë të kuqërremta, sy kafe, është 1.70 m e gjatë dhe peshon rreth 65 kg. ditën kur ajo u zhduk, kishte të veshur xhinse të zeza, një kanatjere të zeze, syze optike dhe mbantë një çantë ngjyrë vishnje.
E ëma e së mitures, ka folur për median greke “Protothema”, duke bërë apel për ndihmë për gjetjen e vajzës së saj. Prindi shprehet se ka frikë për shëndetin dhe mirëqënien e vajzës 16-vjeçare, pasi mesazhi i fundit i së mitures për të ëmën ishte “Nuk do të kthehem më në shtëpi”. Emilia ndërkohë është e paarritshme në shërbimin telefonik, duke shtuar frikën tek familjarët e saj për shëndetin e vajzës së humbur.
“Nuk kam dëgjuar më nga vajza ime që nga nata e së hënës kur ajo u zhduk. Më tha se do të dilte me shoqet e saj për një shëtitje dhe që atëherë nuk është kthyer në shtëpi. Kur pashë se po vonohej të kthehej nga shëtitja, u shqetësova dhe komunikimet tona të fundit ishin nëpërmjet mesazheve në celularin e saj. Mesazhi i fundit ishte se “Nuk do të kthehem më në shtëpi”. Jam shumë e shqetësuar për fatin e fëmijës tim për momentin, telefoni i saj celular është i çaktivizuar, kam frikë se duhet të jetë përfshirë me shoqe të këqija, sepse nuk ka dalë kurrë shetitje me shoqet dhe shoqet e saj, siç më kishte thënë. Dhe mesazhi që dërgoi se “Nuk do të kthehem më në shtëpi”, besoj se fshihet një person tjetër që dëshiron ta dëmtojë. Dua të zbuloj informacione për vajzën time, po e kërkoj kudo dhe dua që ajo të kthehet përsëri në shtëpinë tonë…” tha nëna e vajzës.
Kush mund të ketë informacion lidhur me vajzën, mund të kontaktojë në numrat e emergjencës grekë 100 ose tek “Linja e Telefonit Evropian për Fëmijët e Zhdukur 116000”.
