Ndihmësi i zëvendës-sekretarit amerikan të Shtetit, Hoyt Brian Yee, i cili po qëndron në Kosovë këto ditë, ka ripërsëritur sot thirrjen e Shteteve të Bashkuara për deputetët e Kuvendit të Kosovës që ta miratojnë Marrëveshjen për Demarkacionin e kufirit ndërmjet Kosovës dhe Malit të Zi.
Ai ka thënë se demarkacioni është i saktë, dhe ka shprehur optimizmin e Amerikës se Kuvendi do ta miratojë Demarkacionin, raporton Gazeta Express. “Besojmë se marrëveshja për shënimin e kufirit me Malin e Zi është diçka që duhet të miratohet. Është e planifikuar. Është përgatitur në mënyrë shumë serioze e profesionale”, ka thënë Hoyt Yee, në një intervistë për RTK.
“Siç e dini, ekspertët e Departamentit amerikan të Shtetit e kanë bërë vlerësimin e tyre. Ka qenë edhe një komision qeveritar që po ashtu e ka shqyrtuar marrëveshjen për t’u siguruar se harta, shënimi i kufirit, është i saktë në të dy rastet. Si komisioni qeveritar, po ashtu edhe DASH, arritën në përfundim se ky ishte shënim i saktë”, është shprehur ndihmësi i zëvendës-sekretarit amerikan të Shtetit.
“Shpresojmë shumë se marrëveshja për shënimin e kufirit do të miratohet nga Kuvendi. E mirëpresim faktin që Lista Srpska është kthyer dhe që ka dhënë shenja se është e gatshme ta përkrahë atë”, ka thënë Hoyt Yee.
