Ministri i Brendshëm Ervin Hoxha u takua sot me ambasadorin e ri të Italisë Marco Alberti.
Hoxha shkroi në rrjetet sociale se zhvilloi një bisedë shumë të mirë me ambasadorin e ri të Italisë në Tiranë, Marco Alberti, të cilit i uroi mirëseardhjen dhe suksese në detyrë.
Ministri nënvizoi më tej se “bashkëndamë vlerësimin se marrëdhëniet dypalëshe janë të shkëlqyera dhe konstatuam përkushtimin e plotë të palëve për të thelluar partneritetin strategjik”.
“Shqipëria mbetet e gatshme për të vijuar bashkëpunimin e ngushtë me Italinë mike, në fushat me interes të ndërsjellë, fokusuar në çështje të sigurisë”, theksoi Hoxha.
Hoxha shtoi më tej se me ambasadorin foli për forcimin e luftës kundër kriminalitetit, krimit të organizuar dhe trafiqeve, përmes strukturave të përbashkëta hetimore dhe analizës së informacionit kriminal.
“Shpreha edhe njëherë falënderime për mbështetjen e ofruar nga pala italiane në fushën e menaxhimit të integruar të kufijve, përmes dhurimit pak ditë më parë, të dy anijeve për Policinë tonë Kufitare, për monitorimin e hapësirës detare”, e përmbyll Hoxha postimin. /j.p/
