Ministri për Evropën dhe Punët e Jashtme, Ferit Hoxha, ka marrë pjesë këtë të hënë, në konferencën e 11-të të OSBE-së për Median në Evropën Juglindore, me titull “Forcimi i Gazetarisë si një e Mirë Publike”.
Ai shprehet se Shqipëria mbetet e përkushtuar për forcimin e lirisë së medias, mbrojtjen e sigurisë së gazetarëve, promovimin e pluralizmit mediatik dhe përafrimin e mëtejshëm me standardet evropiane si pjesë e rrugës sonë drejt anëtarësimit në BE.
“Në një kohë kur peizazhi mediatik është bërë gjithnjë e më kompleks dhe kudo sfidues, ne do të vazhdojmë të punojmë për të nxitur një mjedis ku gazetaria e lirë, e pavarur, profesionale dhe etike mund të lulëzojë, ku liria e medias jo vetëm që mbrohet, por forcohet, dhe ripërtërihet vazhdimisht.
Në një epokë të shënuar nga dezinformimi, polarizimi dhe realitetet dixhitale që evoluojnë me shpejtësi, mbrojtja e integritetit dhe pavarësisë së gazetarisë është më e rëndësishme se kurrë. Një mjedis më i sigurt për gazetarët dhe profesionistët e medias është thelbësor jo vetëm për institucione më të forta demokratike dhe besim më të madh publik, por edhe për shoqëri më të qëndrueshme, më të informuara dhe më të shëndetshme.”, shton ai.
Mes të tjerash, ministri Hoxha shprehet se e vlerëson shumë bashkëpunimin me OSBE-në dhe partnerë të tjerë ndërkombëtarë, në mbështetje të një peizazhi mediatik më të sigurt, më të lirë dhe më të qëndrueshëm në të gjithë rajonin.
