UEFA ka bllokuar planin e Gjermanisë për ta ndriçuar pjesën e jashtme të “Allianz Arena” me ngjyrat e ylberit të mërkurën, gjatë ndeshjes së “Euro 2020” me Hungarinë. Ka pasur akuza për pankarta anti-LGBT +, që janë shfaqur në Budapest më herët, në këtë kompeticion. Hungaria sapo ka miratuar legjislacionin që ndalon shkollat të shpërndajnë përmbajtje që konsiderohen promovim i homoseksualitetit dhe ndryshimit gjinor.
Përkundër mbështetjes lokale në Gjermani për solidarizim ndaj njerëzve LGBT +, UEFA ka njoftuar se do të ndalojë ndriçimin me ngjyrat e këtij komuniteti gjatë ndeshjes së Grupit F. Kjo, për të mbajtur qëndrim neutral në lidhje me çështjet politike.
Ja deklarata e UEFA-s: “Racizmi, homofobia, seksizmi dhe të gjitha format e diskriminimit janë një njollë në shoqëritë tona; përfaqësojnë një nga problemet më të mëdha, me të cilat përballemi sot. Sjellja diskriminuese ka dëmtuar dy ndeshje të Europianit gjatë lojës, si dhe jashtë stadiumeve, me ligjërimin në internet rreth sportit që duam.
Megjithatë, UEFA, përmes statutit të saj është një organizatë neutrale për çështjet politike dhe fetare. Duke pasur parasysh kontekstin politik të kësaj kërkese specifike, një mesazh që synon vendimin e marrë nga parlamenti kombëtar hungarez, UEFA e refuzon këtë kërkesë të autoriteteve gjermane”.
Zëdhënësi i DFB, Jens Grittner paralajmëroi se UEFA mund ta parandalojë Gjermaninë të tregojë mbështetje për komunitetin LGBT + për shkak të ligjeve të saj mbi stadiumin para se të bëhej njoftimi përfundimtar. Qeveria lokale në Mynih ka konsideruar gjithashtu ekspozimin e flamujve me ngjyra të ylberit diku tjetër në qytet, pavarësisht nga vendimi përfundimtar i UEFA-s për stadiumin.
Mesfushori gjerman, Leon Goretzka ishte midis shumë anëtarëve të ekipit të tij kombëtar, që mbështeti simbolikën e LGBT + këtë javë: “Do të ishte plotësisht absurde nëse do të duhej të kërkonim falje për të, sepse është absolutisht e qartë se çfarë përfaqëson kjo. Ne si një botë futbolli duam t’i kundërvihemi racizmit dhe homofobisë me shumëllojshmëri”.
Situata e “Allianz Arena” vjen pasi UEFA fillimisht nisi një hetim mbi shiritin me ngjyrat e ylberit të Manuel Neuer, që e ka mbajtur në krahë gjatë ndeshjeve të “Euro 2020”. Mes presionit, organi drejtues i futbollit europian u tërhoq dhe justifikoi: “Shiriti i kapitenit është vlerësuar si një simbol i ekipit për diversitetin dhe kësisoji ka qenë për një kauzë të mirë”.
/a.r
