Xhirimi i djaloshit 5-vjeçar nga Siria, Omran Daqneesh, ka përshkuar tërë botën, duke tronditur të gjithë. Mirëpo, as yjet e Hollivudit nuk kanë mbetu imun ndaj vuajtjeve të këtij djaloshi. Horrori i luftës në Siri është ilustruar në një videoxhirim dhe një fotografi.
Omran është fotografuar në automjetin e ndihmës së shpejtë pasi ishte nxjerrë nga rrënojat e shtëpisë së tij të shkatërruar nga bombardimet e avionëve.
Fytyra e djaloshit ishte e mbushur me gjak, ndërsa trupi me pluhur. Por edhe përkundër lëndimit të rëndë, djaloshi kishte qëndruar i qetë në spital. Nuk ka qarë derisa ia sanonin plagën. Dhe këto pamje kanë shokuar botën, përfshirë edhe yjet e Hollivudit. Në lidhje me këtë është deklaruar edhe këngëtarja Alicia Keys, e cila ka një djalë të moshës së Omranit.
“”Ky fëmijë është i moshës së njëjtë me djalin tim Egypt. Tërë jeta e tij di vetëm për luftë. A mund ta paramendoni këtë? Zemra po më thyhet. Shpresoj se kjo pamje do të nxis udhëheqësit tanë të gjejnë zgjidhje urgjente”, ka thënë Keys.
Edhe Lady Gaga ka deklaruar se është tmerruar nga kjo pamje e djaloshit dhe ka kërkuar që sa më shpejtë të vendoset paqja. Tronditjen dhe pikëllimin e tyre e kanë shprehur edhe Brad Pitt dhe Angelina Jolie, Megan Fox, Leonardo DiCaprio, Brooke Shilds, Ariana Grande, Selena Gomez, e shumë të tjerë, përgatiti “Zëri”. (b.an)
