Bisedimet për daljen e Britanisë së Madhe nga Bashkimi Europian duhet të përfundojnë brenda vitit 2019. Kështu është shprehur presidenti francez, Francois Hollande.
“Kjo zgjedhje e bërë prej britanikëve nënkupton që Britania, me të dalë nga BE-ja, nuk do të mund të marrë më pjesë në vendimmarrjen e Europës së bashkuar”, tha Hollande gjatë një mbledhjeje të përvitshme të ambasadorëve francezë nëpër botë.
“Vendi ishullor nuk do të mund të ketë akses në tregun e përbashkët, derisa të pranojë 4 liritë, rregulloren e saj dhe solidaritetin buxhetor”.
Kreu i “Elizesë” tha gjithashtu se kryeministrja britanike, Theresa May ka përpara saj një vendimmarrje tepër të vështirë, e për këtë arsye i nevojitet kohë, por gjithashtu ajo nuk mund të presë gjatë deri në nisjen e bisedimeve të daljes.
“Nuk do të ishte një gjë e mirë as për Britaninë, por as e pranueshme për Europën”, vijoi më tej Hollande. “Për Francën, gjithçka duhet të përfundojë brenda vitit 2019”.
Për të nisur procesin formal të daljes nga Bashkimi Europian, kryeministrja May duhet të aktivizojë “nenin 50” të Traktatit të Lisbonës, që do të shënonte edhe pikënisjen e procesit dyvjeçar të ndarjes së ishullit britanik nga blloku europian.
Që prej zëvendësimit të David Cameron me zonjën Theresa May, muajin e kaluar, ka pasur spekulime të vazhdueshme mbi kohën se kur duhet të ndodhë diçka e tillë. Kryeministrja britanike pritet t’i kërkojë ministrave të kabinetit të saj përcaktimin e kornizave sesi departamentet e ndryshme të vendit duhet të përgatiten për “Brexit”-in, kur ata të mblidhen ditën e mërkurë.
Raportimet e ditëve të fundit sugjerojnë se May do të aktivizojë “nenin 50” pa mbajtur një seancë votimi në Parlamentin britanik./tch/a.k
