Policia e Kukësit ka dhënë detaje të reja lidhur me incidentin e ndodhur brenda një dyqani ku u hodh një sasi benzine. Sipas policisë autori 49-vjeçari K.SH., është arrestuar dhe po hetohet për veprën penale “Shkatërrimi i pronës me zjarr”.
Gjithashtu, njofton policia, dyshohet se autori vuan nga probleme të shëndetit mendor.
“Në vijim të informacionit të dhënë dje, për shtetasin K. Sh., 49 vjeç, banues në Kukës, i cili dyshohet se hodhi një sasi benzine në dyqanin e një kompanie celulare, bëjmë me dije se specialistët për Hetimin e Krimeve kryen veprimet procedurale për arrestimin për veprën penale “Shkatërrimi i pronës me zjarr”, të 49-vjeçarit, i cili dyshohet se vuan nga probleme të shëndetit mendor”, thuhet në njoftimin e policisë.
Ngjarja ndodhi një ditë më parë në lagjen nr.2 të Kukësit, ku 49-vjeçari ka derdhur një sasi benzine brenda dyqanit dhe u ka bërë thirrje punonjësve dhe klientëve të pranishëm të dalin jashtë, duke krijuar një situatë të tensionuar dhe potencialisht të rrezikshme.
