Ish-traineri i përfaqësueses të Zvicrës, Ottmar Hitzfeld, vlerëson se mesfushori gjilanas Xherdan Shaqiri shpesh kritikohet padrejtësisht, por se këto i ndodhin çdo lojtari të madh, ndaj të cilit pritjet janë shumë të mëdha.
Gazeta zvicerane “Blick” ka notuar Shaqirin me notën tre, që i bie dobët, për paraqitjen e tij në barazimin 1:1 të Zvicrës të mërkurën ndaj Rumanisë në ndeshjen e xhiros së dytë të fazës së grupeve të Evropianit “Francë 2016”, përcjell Koha Ditore. Në të vërtetë paraqitja e Shaqirit nuk është lavdëruar as në ndeshjen e parë në fitoren 1:0 ndaj Shqipërisë.
“Xherdan Shaqiri mund të them se kurrë nuk vlerësohet objektivisht. Është disi e padrejtë se sa kritika duhet të përballojë ai. Kundër Rumanisë u mundua të ngrihej, por i mungoi pak vetëbesimi, për të bërë driblingje vendimtare.
Në këtë duhet të punojë. Por, nuk duhet harrohet se në pjesën e parë çdo gjë shkoi nëpërmjet tij dhe Stephan Lichsteinerit në sulm. Ana e djathtë po funksionon dhe nuk ka diskutim këtu. Shaqiri po ashtu ka punuar shumë në aspektin defensiv.
Por, nga Shaqiri gjithmonë pritet magji. Pritjet janë aq të mëdha, që çdo ndeshje ta bëjë të veçantë. Ai ka potencial të madh. Kështu pritjet janë te çdo top-lojtar.
Por unë jam i bindur se me vazhdimin e turneut ai do të përmirësohet. ‘Francë 2016’ mund të jetë turneu i tij”, ka thënë Hitzfeld… (b.an)
