Historia e prostitutës shqiptare që u muros në Belgjikë
Kur kanë kaluar 4 vjet, qëkur prostituta shqiptare, Albana Margjeka, u gjet e murosur në Belgjikë, familjarët e saj kanë pajtuar një detektiv privat, për të zbardhur të vërtetën.
Margjeka humbi gjurmët në vitin 2008 dhe trupi i saj i pajetë u gjet pranë një ure në vitin 2011, teksa i dyshuari për vrasjen e saj u dënua në mungesë me burg përjetë.
Ekspertiza konstatoi 100 për qind se bëhej fjalë pikërisht për 30-vjeçaren Margjeka, ndaj lajmi iu përcoll familjarëve të saj, të cilët jetojnë në Itali. Ajo ishte vrarë pikërisht në ditën kur kishte marrë vesh se ishte shtatzënë.
Mirëpo, këta të fundit, duket se janë zhgënjyer nga ecuria e hetimeve dhe lirimi i dy të akuzuarve kryesorë ka bërë që të angazhojnë një hetues privat, për të mësuar çka ndodhur me Albanën. Duket se një shtysë të madhe kësaj nisme i ka dhënë vajza e Albanës, e cila në kohën kur e ëma u zhduk ishte e mitur.
Tashmë, Eneida është 19 vjeçe dhe ka kontaktuar me një detektiv privat për të mësuar më shumë mbi zhdukjen e nënës së saj në vitin 2008. Për humbjen e 30-vjeçares, Policia Shqiptare dha një njoftim asokohe, ku kërkonte ndihmën e personave që mund të kishin dijeni rreth ngjarjes.
Mëngjesi i 15 janarit 2008 e gjeti të lumtur 30-vjeçaren Albana Margjeka, pasi mësoi se ishte shtatzënë. Atë natë ajo u zhduk përgjithmonë, ndërsa kur policia e gjeti kufomën e saj 3 vjet më vonë, vuri re se trupi i pajetë ishte futur brenda një shtylle betoni, në një urë në Wallonia. Ajo ishte qëlluar më parë me 2 plumba në mushkëri. Ishte një vend i përkryer, ku një vrasës mund të fshihte një kufomë. Patologu mjekoligjor, Wim Van de Voorde, thotë se “Nëse një vrasës e ka arritur përfundimisht qëllimin e tij dhe viktima ka vdekur, ai ende ka nevojë që të fshehë trupin.
Mesazhi i ngjarjes është: Muroseni shpejt. Sepse pas disa orësh trupi bëhet i ngurtë”. Prokurorët në Charleroi kanë marrë rezultatet e plota dhe përfundimtare të testeve gjenetike të porositura pas zbulimit të trupit, më 13 tetor 2011 në Tarcienne në njësinë Walcourt. Trupi i përkiste Albana Margjekës, 30-vjeçares së zhdukur që nga 15 janari 2008 në Hamsur-Heure. Kufoma u mbajt në morg për tre muaj. T
estet e ADN-së zhdukën çdo dyshim të mbetur. Familja, e cila jeton në Itali, u informua për rezultatet. Në kohën e zbulimit, familjarët thanë se nuk kishin mjete financiare që të riatdhesonin eshtrat në Shqipëri. Autopsia zbuloi praninë e dy plagëve të plumbave dhe goditje të rënda, si shkelma etj. Më pas Albana është vrarë nga dy të shtëna në zonën e zemrës, nga një distancë e afërt. Autopsia zbuloi se ishte shtatzënë.
Christian De Groot, 55 vjeç dhe Frans Rudelopt, 51 vjeç, janë të akuzuar për vrasjen e Albana Margjekës. De Groot ishte partneri i saj për disa vite dhe ishte personi me të cilën ajo kishte mbetur shtatzënë. Pas nxjerrjes së fotografive të trupit të viktimës në urë, ku ishte betonuar, gjykata dëgjoi ekspertët e mjekësisë ligjore. Ata thanë se plumbat e shkrepur nga afërsia e kanë shpuar mushkërinë dhe zemrën e viktimës. Të dy të akuzuarit fajësonin njëri-tjetrin, gjatë proceseve gjyqësore. Por në njërën prej seancave gjyqësore, De Groot kishte arritur të arratisej. Në vitin 2013, një gjykatë në Belgjikë ka vendosur të dënohet në mungesë me burgim të përjetshëm për vrasje. Sipas avokatit të tij, 55-vjeçarit i kishte rënë të fiktë kur mori vesh vendimin e formës së prerë, pasi çështja kaloi edhe në Gjykatën e Lartë, e cila gjithashtu la në fuqi të njëjtin vendim. Nuk dihen ende rrethanat dhe shkaqet e vrasjes, por gjatë hetimeve besohej se mësimi i faktit që 30-vjeçarja që asokohe punonte si prostitutë, ishte shtatzënë, kishte shkaktuar grindje mes saj dhe 55-vjeçarit.
