Prapa sulmit terrorist në aeroportin e Stambollit, mund të jetë një çeçen i cili ka fituar statusin e refugjatit në Austri, shkruajnë mediat në Vjenë, ku ndër tjera thuhet se bëhet fjalë për Ahmed Chataev, i cili kishte shkuar në Austri në vitin 2003 ku edhe kishte fituar statusin e azilantit.
Nëntë vite më vonë, ishte bërë xhihadist në Siri, kurse tani është i dyshuari kryesor për sulmin në aeroportin Ataturk të Stambollit, shkruan e përditshmja vjeneze “Die Presse”, transmeton Telegrafi.
“Autoritetet turke tashmë na kanë kontaktuar”, ka konfirmuar zëdhënësi i ministrisë së punëve të brendshme të Austrisë, Karl-Heinz Grundbek.
Chataev, baba i katër fëmijëve, është i njohur për policinë austriake ku në bazën e tyre të dhënave figuron, si “luftëtar i huaj” ose një person që i është bashkuar luftës së armatosur të ekstremistëve islamikë në Siri.
Më shumë se gjysma e “luftëtarëve të huaj” që kanë shkuar nga Austria në Siri, janë me prejardhje nga Çeçenia.
Sipas “Die Presse”, Chataev, për herë të fundit është parë në rajonin kufitar midis Sirisë dhe Turqisë.
Emri i tij është përmendur edhe më herët në mediat turke, si organizator i sulmit të përgjakshëm në Ankara gjatë tetorit të vitit të kaluar.
Tani emri i tij është shfaqur edhe njëherë si organizatorë i sulmit terrorist në aeroportin e Stambollit.
Mediat turke thonë se grupi terrorist që e rrethon Chataevin ishte futur në territorin turk më 25 maj, dhe se anëtarët e tyre kishin marrë me qira apartamente në të cilët kishin planifikuar sulmin.
Në fund të viteve të 90-ta, Chataev kishte luftuar në anën e rebelëve qeqenë, kurse në vitin 2000 ishte plagosur ku edhe kishte përfunduar në duart e forcave ruse.
Më vonë kishte arritur të ikë për në Austri, kurse gjatë procedurës së dhënies së azilit, ai kishte deklaruar se kishte qenë i keqtrajtuar.
Mediat turke e quajnë “Çeçeni me një dorë”, pasi gjatë luftës kishte humbur njërën dorë./a.m.
