Aventura dashurore mes dy të rinjve duket se po mbyllet me një “happy end” për të rinjtë, por pasojat duket se do të bien tani e tutje mbi babain e vajzës.
Ngjarja e para 8 muajve në Sukth të Durrësit ku 16-vjecarja Gazie Kazija iku nga shtëpia me një taksi tek i dashuri që e priste në Plepa, ka tashmë një zhvillim të ri. Babi i vajzës, 46-vjecari Destan Kazija, është arrestuar pas 8 muajsh arrati për veprën penale të plagosjes me dashje të taksistit që transportoi vajzën e tij drejt shokut të saj në Plepa me të cilin ishin njohur nëpërmjet “Facebook”-ut.
46-vjeçari nga inati i largimit të vajzës nga shtëpia u përball me taksistin, ndonëse ky i fundit kishte bërë thjesht dhe vetëm punën me të cilën ai jeton prej kohësh, transport udhëtarësh.
Taksisti me iniciale V.Z., 33 vjeç, është gjithashtu fqinj i familjes Kazija në Sukth të Durrësit dhe kjo duket se është edhe arsyeja se përse 46-vjeçari nuk e ka pranuar dot që fqinji i tij duke bërë punën e taksistit po bëhej njëkohësisht edhe dëshmitar i diçkaje jo shumë të pranueshme për familjen Kazija.
Babai i vajzës punonte dhe jetonte në Greqi dhe pasi ka marr vesh largimin e 16-vjeçares u nis me urgjencë drejt shtëpisë së tij, ku jetonte bashkëshortja me dy fëmijët e tjerë. menjëherë pasi ka mësuar fabulën se si ishte larguar vajza nga shtëpia dhe kush e kishte transportuar për tek i dashuri, disa vite më i madh se ajo në moshë, Destani ka shkuar për t’i kërkuar llogari taksistit, madje u konfrontua fizikisht me të duke e plagosur rëndë me thikë dhe më pas u largua në drejtim të paditur.
Pas tetë muajsh, policia ra në gjurmët e 46-vjeçarit, duke kryer edhe arrestimin e tij. “Specialistët e Sektorit kundër Krimeve të Rënda në Drejtorinë Vendore të Policisë Durrës, në vijim të punë së ture për kapjen dhe vënien para përgjegjësisë të personave në kërkim, kanë bërë të mundur ndalimin e shtetasit: Destan Kazija, 46 vjeç, banues në Sukth i Ri, Durrës.
Gjykata e Rrethit Gjyqësor Durrës, ka dhënë masën e sigurisë “Arrest me burg” për veprat penale “Plagosja e rëndë me dashje”dhe “Mbajtja pa leje e armëve të ftohta”. Kazija, më datë 26.05.2016, rreth orës 07:30, në Sukth i Ri, Durrës, për motive të dobëta ka tentuar të vrasë me thikë, shtetasin V.Z. 33 vjeç, duke i shkaktuar plagë të rënda”, sqaron policia./a.m.
