Transportuesit shqiptarë të mallrave me Italinë nuk do të paguajnë më shifrën prej 150-180 euro.
Ministri i Transportit dhe Infrastrukturës Sokol Dervishaj, njoftoi se dekreti që ka hyrë në fuqi në datë 20 shtator parashikon heqjen e taksës fiks (diritto fisso) dhe asaj të qarkullimit.
“Të gjithë transportuesit ndërkombëtarë të mallrave me Italinë, se duke filluar nga dita e sotme, ata nuk do të duhet të paguajnë më tarifën prej 150 deri në 180 euro, për një udhëtim vajtje ardhje në Itali. Pala Italiane, ka publikuar në fletoren e saj zyrtare dekretin për heqjen e “taksës fikse” dhe atë të qarkullimit, në datën 20 Shtator, duke i dhënë frymëmarrje kompanive shqiptare që ishin të detyruara të paguanin këtë taksë. Heqja e këtyre taksave që ishin vendosur në vitin 1953, është një nismë që besoj se do të përmirësojë dukshëm dhe do të rrisë edhe më shumë shkëmbimet tregtare dhe të transportit me Italinë, e cila është dhe partneri kryesor ekonomik dhe tregtar i vendit tonë. Unë siguroj gjithë shoqatat e transportuesve të Shqipërisë, se Ministria e Transportit dhe unë personalisht do të jemi avokati i tyre, në gjetjen e zgjidhjeve për problemet me të cilat ballafaqohet sektori i transportit”.
Monitor/d.i.
