Nga dita e nesërme, 27 shërbime të zyrave të Regjistrimit të Pasurive të Paluajtshme do të merren nga zyrat e noterëve përmes aplikimeve online. Ky lloj shërbimi pritet t’u japë fund radhëve të gjata të qytetarëve në sportelet e hipotekave, si edhe abuzimeve në këto institucione. Në një intervistë për gazetën Panoram”, kryetarja e Dhomës Kombëtare të Noterisë, Mimoza Sadushi, sqaron procedurën e aplikimit online, ku thekson faktin se përmes shërbimit të ri qytetari do të ketë kontakt vetëm me zyrën e noterit.
“Nuk do të ketë më qytetarë që do të shkojnë sa nga zyra e noterit në sportelet e bankës dhe më pas në sportelet e zyrës së regjistrimit. Qytetari do të paraqitet përfundimisht vetëm në zyrën e noterit”, shprehet Sadushi. Në këto zyra, sipas saj, do të bëhen edhe pagesat për shërbimet dhe po ashtu edhe tërhiqja e shërbimit të kërkuar nga qytetari. Sadushi sqaron se afati i shqyrtimit të një aplikimi është tri ditë, afat që nis me konfirmimin e një aplikimi të suksesshëm. Sipas saj, sistemi i aplikimeve online garanton shqyrtim të kërkesave të qytetarëve, njëri pas tjetrit, në varësi të kohës së aplikimit, duke shmangur mbivendosjen e tyre apo lënien të pashqyrtuar të ndonjë kërkesë.
Cili është thelbi i marrëveshjes së nënshkruar mes Dhomës Kombëtare të Noterisë dhe Zyrës së Regjistrimit të Pasurive të Paluajtshme dhe cilat janë përfitimet e qytetarëve prej saj?
Thelbi i kësaj marrëveshjeje që ne nënshkruam me ZRPP-në është që 27 nga 51 shërbime që ofron zyra e regjistrimit, kalojnë online, në veprime që do të kryhen direkt nga zyra e noterit. Ndërsa pjesa tjetër e shërbimeve i mbetet Zyrës së Regjistrimit. Këto përgjithë- sisht janë shërbime që kanë lidhje me veprimtarinë e noterit. Pra, përfshihen të gjitha kontratat për transaksione, përfshihen të gjitha kontratat hipotekore, deklaratat noteriale për lirimin e pronës, nxjerrja e certifikatave kartelave dhe hartave të pronësisë, verifikimi i gjendjes juridike të pronës etj.. Pra, të gjitha ato veprime që kanë lidhje me veprimtarinë e noterit. Nëse deri dje kjo procedurë mbetej “përgjysmë” në zyrën e noterit, pasi noteri përfundonte aktin noterial dhe më pas i thoshte qytetarit që “mund të shkosh e ta regjistrosh vetë”, tashmë themi që kjo procedurë fillon dhe mbaron në zyrën e noterit. Është noteri që fillon që nga aplikimi dhe deri në marrjen e certifikatës së pronësisë, apo dokumenteve të tjera që dalin nga zyra e regjistrimit sipas aplikimit që do të bëjë noteri. Të gjitha do të kthehen në zyrën noteriale.
PANORAMA
