Nga Skënder Minxhozi
Bujar Nishani ndodhet këto ditë në SHBA. Dje ai ka kryer “ritualin” e zakonshëm, të një interviste në studiot e Zërit të Amerikës. I pyetur për situatën në Shqipëri, Presidenti ka thënë se vendi ka nevojë për reforma të mëdha, sidomos në fushën e drejtësisë. Kjo deklaratë ka ardhur nga goja e njeriut që më së shumti është bërë pengesë për reformën në sistemin e drejtësisë.
Bujar Nishani ka marrë një pozicion të ashpër refraktar në krye të Këshillit të Lartë të Drejtësisë, duke bllokuar shpesh masat ndëshkuese për gjyqtarët e reklamuar për shkelje të rënda, si dhe duke mbrojtur anëtarët e KLD që kanë rezultuar me pasuri përrallore apo që kanë marrë vendime të dyshimta gjatë karrierës së tyre.
Edhe gjatë intervistës në fjalë, kreu i shtetit ka anatemuar atë që e quan presion politik mbi drejtësinë, por mesa duket nuk i ka lexuar deklaratat e fundit të ambasadores Vlahutin, e cila akuzoi KLD dhe opozitën, për mungesë vullneti për të marrë pjesë në reformat në drejtësi. Duket se ndërkombëtarët i kanë të qarta arsyet që pengojnë hyrjen në hullinë e reformave. Ato arsye që Bujar Nishani nuk është në gjendje t’i identifikojë edhe kur është jashtë territorit shtetëror.
Redaksia Online
(JavaNews.al)
